Dinastía Qing

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os Qing estioron una dinastía d'emperadors manchús que gobernoron en China con capital en Pekín dende 1644 dica 1912 estando reconoixitos como sobirans tamién por os mongols orientals.

Gran Qing 大清
← ← 1644 — 1912 →
Situación de Dinastía Qing
Capital	Shenyang (1636–1644) Pequín (1644–1912)
Idioma oficial	Chinés y manchú
Gubierno	Monarquía
• Formación	1644
• Revolución Xinhai	1912

Orichens

Os churchez yeran habitants tunguses de Manchuria sozmesos a os mongols y en contacto con os chineses han d'a rechión de Liaodong (cabo sud de Manchuria). En a decada de 1590 Nurhachi, uno d'os caudiellos churchez imposa a suya autoridat a bels clans y forma ueito banderas, (formacions militars de bels mils d'hombres), proclamando-se khan en 1616. En 1618 entran en guerra cuentra os chineses de Liaodong, vencendo y entrando en a suya capital Shenyang en 1621, baptizando-la como Mukden. Nurhachi se i estableix en 1625, dende a conquiesta de Liaodong a mayoría d'os subditos son chineses y no churchez u manchús. Nurhachi imposa a los chineses como prueba de leyaltat o uso d'a mesma coleta que se deixaban creixer os churchez, pero mantién l'administración chinesa. Muere en 1626.

Li succede o suyo fillo Abahai. Abahai tien l'habilidat de conseguir l'adhesión de bellas tribus de mongols meridionals, que li permiten vencer a os mongols chakars, que teneban uns khans con a lechitimidat de continar a Chinghis Khan. Abahai s'apropia d'o siello imperial d'os Yuan y li permite fer-se considerar legalment Gran Khan d'os mongols. Se constituyen ueito banderas mongols a lo servicio suyo. En 1636 Abahai decreta que toz os churchez forman un pueblo unico, os manchús y se proclama emperador, fundando a dinastía Qing, "a pura". Bels autors afirman que o nombre de Manchuria (Man-Shu-Shi-Lu) li'n posó Abhai en 1636. Recluta entre os chineses de Liaodong ueito banderas chinesas en 1642. Lo succede o suyo fillo Fulin con Dorgon como rechent.

Primers emperadors Qing en China

En 1644 o caudiello rebel chinés Li Cicheng s'apodera de Pequín, l'emperador chinés se suicida. O cheneral chinés Wu Sangui clama a los manchús pa forachitar a Li Cicheng. Dorgon, rechent manchú proclama a Fulin emperador con o nombre de Shunzhi. Os manchú encomienzan a conquiesta de China. Os partidarios d'a dinastía chinesa Ming se refuchian primero en Nanquín, dimpués en o baixo Yanci (1645-1646), Guangdong, y finalment Yunnan, on son exterminatos en 1661.

Os Qing son respetuosos con as institucions chinesas, sin querer estar asimilatos por os chineses quieren estar emperadors de China y se comportan como o confucianismo espera que se comporten os emperadors. Encara que imposen o uso d'a coleta, a mayor parte d'os funcionarios lis ofreixen leyaltat. A dinastía Qing estió estable en os primers tiempos. A Shunzhi li succeden tres emperadors enerchicos: Kangxi, Yongzheng y Quianling.

Os Qing protechen a os manchús de l'asimilación u a mezcla con os chineses han. Manchuria disfruta d'autonomía. Prohiben a os chineses emigrar ta Manchuria (fueras de Liaodong). Prohiben os matrimonios mixtos. Os primers emperadors manchús feban un viache en vida t'a ciudat santa de Mudquen, on yeran honratos con flors y perfumes, con enchaquia d'esto o camín entre Pequín y Mudquen yera vedato baixo pena de muerte (en as zagueras decadas de l'imperio este costumbre se relaxará, no viachaba ta Mudquen que una fotografía de l'emperador). Os primers emperadors tamién pasaban un tiempo cazando en Manchuria pa seguir a tradición d'os suyos antipasaus cazadors. En os puestos importants de poder os manchús son mayoritarios. As tres luengas oficials son o manchú, o mongol y o chinés.

Formación d'as mugas de l'Imperio Chinés

A dinastía manchú pronto tiene problemas en politica internacional. Os rusos arriboron en a costa pacifica en 1639, entroron en a cuenca de l'Amur y topetoron con tropas manchú dende 1654. Os oiratos atacoron a os mongols khalkhas en 1680. L'emperador Kangxi quiere evitar que os rusos entren en Manchuria y que influyan en os mongols. Por o tractau de Nertchinsk en 1689 cuasi tota a cuenca de l'Amur queda fuera de l'Imperio Ruso, y tamién os territorios d'os khalkhas, que reconoixen a sobiranía d'os Qing en 1691.

En 1696 Kangxi contraataca y refusa a os oiratos de Dzhungaria encara que no los derrota. Dimpués o Tibet se debate entre a influencia de Dzhungaria y a influencia d'a China Qing. Dende 1720 se consolida o dominio sobre o Tibet. En a decada de 1750 os oiratos de Dzhungaria son vencitos por os Qing y exterminatos. Os Qing baptizan o Turquestén oriental como Xinjiang ("nuevos confins") en 1768.

Apertura a Occident

Kangxi autoriza oficialment o cristianismo en 1692 dimpués que os chesuitas fesen de meyadors con os rusos en o tractau de Nertchinsk. Belunas d'as órdens cristianas tornan a prener a baralla d'os ritos chineses como o culto d'os antipasaus, que Roma prohibe a los cristianos. Kangxi i vei una intromisión en os afers chinés y en 1724 o suyo succesor Yongzheng revoca l'edicto de 1692. A Companyía de Chesús será disuelta en en 1773. Se calcula que dica a suya disolución heban conseguito convertir arredol de 200.000 chineses. Como consecuencia d'o tractau de Kiakha de 1727 os rusos estableixen una misión ortodoxa en Pequín que no tendrá garra influencia.

En 1793 l'emperador recibió una misión oficial britanica dirichita por Lord Macartney que demandaba l'apertura de relacions comercials y diplomaticas. Fracasó como as misions holandesa, francesa, rusa y atra misión britanica en 1816.

Cambios socials y sublevacions

En a segunda metat d'o sieglo XVIII a población de China pasa de menos de 150 millons ta mes de 300.000, explicable por l'aumento de producción de cerials, a paz interna y o comercio interior. A producción de cerials aumentaba por a millora d'a productividat, a introducción de nuevos cautivos (panizo) y a extensión d'as superficies cautivables. A colonización de nuevas tierras afectó sobretot a lo sudueste, fendo baixar o porcentache de población nativa, y a Manchuria.

L'aumento d'a población continará dimpués d'haber plegato a lo maximo de producción agraria. Esto fa que aumente la tensión social, y que los Qing, ya decadents no podrán controlar. A población se fa mes vulnerable a catastrofes natural como sequeras, inundacions, etc....

Entre 1780 y 1790 se sublevan os hui de Gansu, os chineses de Taiwán, os miau d'o sudueste y os habitants d'os monts a lo sud de Xi'an (1796). Esta zaguera yera dirichita por a secta d'o Loto Blanco, reclutó chent entre os campesins mes pobres y yera antimanchú y dica 1806 no fue esclafata de tot.

Bibliografía

• Jean Sellier. Atlas de los pueblos del Asia meridional y oriental. Acento Editorial.
• Vicente Talón. China-URSS entre la geopolítica y la ideología. Libros directos.

Vinclos externos

• Se veigan as imáchens de Commons sobre a dinastía Qing.

• Datos: Q8733
• Multimedia: Qing Dynasty / Q8733