O cardau d'a lana ye una fayena que se fa con a lana ya escarmenada pa rematar de desfer-le os nudos y escarpir-la, deixando as fibras d'o pelo bien lisas y como mas paralelas millor, pa dimpués poder-las filar.

Muller cardando lana entre dos cardas.

A lana, que ya ye tova y molsuda dimpués d'haber-se escarmenau, se carda clavando-la entre dos «cardas». As cardas son dos peines plans con pugas de fierro que s'agafa con as mans por os mangos en sentiu contrario, y alavez se tira, pero nunca basto, suave-suave, o que causa que a fibra de lana s'estire y s'escarpixca os nudos entre as pugas. Si se preta con as cardas a lana puede «apedregar-se», que ixo ye formar-se nudos nuevos y piors, con que no se podría filar dimpuesas.

Os brins de lana ya cardada se quitan d'a carda («esbrinar») y s'alzan envolicando-los arredol d'una rueca, con a cual se filarán dimpués. A rueca ye un tocho con unas pugas en l'estrimo, por an se pilla os brins de lana que luego se fa baixar arredol. A ixo se le diz «rocar» u «arrocar» a lana.[1] Meter a lana en a rueca teneba por misión poder-la portiar ta o mont u tan que calese, fuera d'a casa, y filar astí sin que una volada d'aire u cosa asinas la tresbatisen, entre que en a casa se gosaba fer con un canastico.[1]

Se veiga tamién editar

Referencias editar