Cadenas de nieu

As cadenas pa la nieu son un sistema antieslisador que se mete en as ruedas motrices d'un vehíclo a motor pa que istas no s'eslisen, quan i hai nieu u chelo en la carretera.[1]

Iste sinyal obliga l'uso de cadenas en carretera.
Cadenas en rombo. Tienen una mayor eficacia y rendimiento.
Furgón sovietico equipau con cadenas en escala.

Pueden no estar cadenas propiament ditas. I hai sistemas que van dende una pieza de plastico a un funda de tela. O suyo uso en limita la velocidat a 50 km/h.

A lechislación espanyola contempla os pneumaticos d'hibierno como una alternativa valida a las cadenas de nieu, tal como replega o Reglamento Cheneral de Vehíclos, basau en o Real Decreto 2822/1998 d'o 23 d'aviento.[2]

Existen diferents tipos de cadenas pa la nieu:

  • Metalicas
  • De tela
  • Automaticas

ColocaciónEditar

Seguntes a motricitat d'o vehíclo:

  • Tracción debantera: Siempre que o espesor d'a nieu no supere 1,5 cm, se fican en as ruedas debanteras (con más espesor, obligatorio en as 4 ruedas). A mayoría d'autos actuals son de tracción debantera.
  • Tracción zaguera: Siempre que o espesor d'a nieu no supere 1 cm, se fican en as ruedas zagueras (con más espesor, obligatorio a las 4 ruedas). Os autos antigos, d'altas prestacions y vehíclos de carga gosan estar de propulsión posteriera.
  • Tracción a las quatre ruedas: Por lei ye obligatorio l'uso a las quatre ruedas. En caso d'avería d'una d'as quatre se gosan meter dos dezaga, pero ye posible fer-lo debant pa amillorar a dirección y frenada, encara que en garra caso se circulará con tres cadenas.

Siga qual siga o tipo d'auto, ye convenient equipar cadenas en as quatre ruedas; fueras d'os casos en que o fabricando indica o contrario, como ye o caso de vehíclos esportivos de propulsión zaguera y gran cilindrada.

Tamién cal parar cuenta en que as cadenas son disenyadas pa una grandaria especifica de rueda. Ye important seguir as instruccions con a finalidat de veyer a grandaria de ruedas pa las que son disenyadas.

FuncionamientoEditar

O funcionamiento d'as cadenas ye muit sencillo. O prencipio de funcionamiento se basa en un aumento d'o coeficient de rozamiento, u de fricción, entre o pneumatico y o pavimento cubierto de nieu u chelo. O coeficient de rozamiento pneumatico-asfalto, ye o que popularment se conoixe como adherencia d'o pneumatico. En condicions normals, o coeficient de rozamiento entre o pneumatico y l'asfalto ye idonio (entre 0.4 y 0.6), pero en producir-se nevazos y/u cheladas, o coeficient de rozamiento disminuye substancialment, chenerando a perdida de tracción y maniobrabilidat, y a consiguient perdida de control sobre o vehíclo:

  • En o caso de cadenas d'ariellos sobre chelo, con un coeficient de rozamiento muit elevau, pero nomás en os puntos a on cada ariello dentra en contacto con o pavimento, en circular sobre un pavimento chelau, os ariellos d'a cadena se fican en a placa de chelo present, puyando o coeficient de rozamiento y a capacidat de tracción d'o vehíclo. A o mesmo tiempo, se libera asinas una parti de chelo humido, que encara que contina estando eslisadizo, ofreixe una mayor adherencia a o pneumatico.
  • En o caso de cadenas de ariellos sobre nieu, a cadena se interposa entre o pneumatico y l'asfalto y actúa como una escala en meter más fricción, a causa de l'acero en contacto con o pavimento.
  • En o caso de cadenas textils sobre nieu, istas presientan un menor coeficient de rozamiento por unidat de superficie, pero iste aumento s'ixemena por toda a superficie d'o pneumatico en contacto con o pavimento, aconseguindo una millor adherencia.

Posibles problemasEditar

  • Conducción masiau rapida. As cadenas no suportan circular a más de 50 km/h.
  • Conducción sobre asfalto seco. As cadenas se deterioran ascape sobre superficies inadequadas.
  • Achuste poco firme. S'han de reachustar os tensors d'as cadenas pocos metros dimpués d'haber-las colocau, movendo l'auto a bonico. Se podrían enreligar en l'eixe de transmisión causando una avería important.
  • Tensors necesarios u innecesarios. A mayoría de cadenas amenistan de tensors; si no s'usan se descolocan. As que no amenistan tensors, si se meten, pueden resultar grieument danyadas.
  • Desgaste natural. Qualques fuents citan que a suya durada se reduz a bells 500 km.

Precaucions dimpués d'o suyo usoEditar

Con as cadenas clasicas, dimpués d'o suyo uso cal procurar de limpiar-las con augua calient u millor posible, a fin d'eliminar-ne a sal que s'escampa por as carreteras d'hibierno, ya que os cloruros d'as sals atacan y corroden l'acero. Y dimpués, guardar-las en a suya caixa en un sitio seco y accesible adintro d'o maletero d'o vehíclo.

AlternativasEditar

En o mercau i hai alternativas a las cadenas tradicionals:

  • Fundas de tela. Son as mas conoixidas. Substituyen a las cadenas, pero han de retirar-se a l'inte quan no i hai nieu.
  • Dispositivo en forma d'araina, que s'empara a o torniello d'a llanda y s'abraza a o pneumatico. Se fican en pocos segundos y a suya eficacia ye muit buena. O suyo pre aproximau ye de 400 €.
  • Cable d'acero. Substituyen a cadena por un cable d'acero; o suyo funcionamiento ye identico.
  • Aerosols antieslisadors por uns 5 €. Os mesmos fabricants advierten que son nomás pa salir d'una dificultat puntual.

Se veiga tamiénEditar

ReferenciasEditar

Vinclos externosEditar