Viviparismo
O viviparismo u viviparidat ye a cualidat d'os animals que l'embrión se desarrolla dentro de bella clase d'estructura en o vientre de su mai, an que recibe os nutrients y l'oxicheno preciso pa medrar y desarrollar-se, dica l'inte de naixer. Os animals que libran as crías vivas se diz que son viviparos.
Un eixemplo clasico d'animals viviparos son os mamiferos. Manimenos, no toz os mamiferos son viviparos, pos o grupo d'os monotremas meten uevos y por tanto son oviparos.
Una atra cuestión ye que a forma de viviparismo que siguen os mamiferos ye una d'as mas evolucionadas entre os sers vivos, que se diz viviparismo placentario. En a naturaleza existen atras formas menos sofisticadas de viviparismo, como as que tienen diferents tipos de reptils, amfibios urodelos, peixes u insectos.