Orientación sexual
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
A orientación, inclinación o delera sexual se refiere ta un patrón d'atracción sexual, erotica, emocional u aimorosa enta una determinata colla de personas definitas por o suyo sexo. A orientación sexual e lo suyo estudio pueden trestallar-se en cuatre partis prencipals: a heterosexualidat u atracción enta personas d'o sexo oposato, homosexualidat u atracción enta personas d'o mesmo sexo; a bisexualidat u atracción enta personas d'entramos sexos; e l'asexualidat u manca d'atracción sexual.[1] O comportamiento sexual humán, a identidat de chenero e a identidat sexual son termins relacionatos con a orientación sexual, ya que psicolochicament conforman a percepción sexual d'una persona. A preferencia sexual, d'atra man, suchiere bel grau de triga, que determina la vida d'una persona en establir un chenero como obchecto de deseyo, por o que ye incorrecto emplegar o termin ta referir-se ta la orientación sexual d'una persona.[2] A consonancia u disonancia se refiere a la relación u similaridat entre preferencia sexual e a orientación sexual. S'aplica o termin consonancia a una persona que as suyas preferencias sexuals coincide con a suya orientación sexual (por eixemplo: un hombre declarato homosexual que en mantién de relacions sexuals con personas d'o chenero masculín), entre que a disonancia se refiere ta la diferencia entre a preferencia sexual e a orientación sexual (por eixemplo: una muller declarata heterosexual que en siente d'atracción sexual por personas d'o chenero femenín, pero que en mantién de relacions sexuals con personas d'o chenero masculín e que prefiere estar dita heterosexual).[3]
Definición
editarOs estudios cientificos efectuatos en l'arco de decadas han constrimostrato que a orientación sexual ha una gama especifica que puet variar dende a total atracción enta personas d'o mesmo sexo dica la total atracción enta personas d'o sexo oposato; manimenos, se gosa emplegar tres categorías ta definir a la orientación sexual: heterosexual, homosexual (lesbiana u gai) e bisexual —respectivament; atracción enta personas d'o sexo oposato, d'o mesmo sexo e d'entramos sexos.[4][5] En cualques casos, se considera una orientación sexual mesmo l'asexulidat, ye dicir, a escasa u nula atracción enta personas tanto d'o sexo oposato como d'o mesmo sexo u simpla manca d'orientación sexual.
Encara que siga d'uso común discutir sobre a orientación sexual considerando-la como una caracteristica estrictament personal, a la par que o sexo biolochico u a edat, o que no ye de tot correcto: a orientación sexual se define, de feito, a traviés d'as relacions interpersonals e va a ormino a determinar o tipo d'individuos que una persona triga frecuentar e con qui aspera trobar una relación sentimental satisfacient, bella cosa fundamental ta la realización personal de muitos individuos.[4] Ye mesmo distincto d'a simpla actividat sexual, que puet mesmo no esprisar a orientación sexual d'una persona.[5]
Toz os tipos d'orientación sexual son trazas normals con que os sers humans n'entablamos de lazos afectivos;[4] a tamas d'os estereotipos esparditos seguntes que as personas con orientación sexual no heterosexual estarban trestucatos u anormals, a rechira no ha dixato platero garra tipo de vinclo entre orientación homosexual u bisexual e a psicopatolochía e, por tanto, a definición d'a homosexualidat como "trestuque mental" ye estata albandonata ya fa tiempo por as asociacions de clasificación que operan en iste campo.[4]
A "preferencia sexual"
editarA vegadas se ye usata a esprisión "preferencia sexual" como sinonimo d'"orientación sexual"; sindembargo istos dos termins han un significato distincto en a demba psicolochica.[6] O termin "preferencia", de feito, suposa bel grau de libre triga d'a propria orientación sexual, bella cosa que un individuo no necesariament ha e que no ha trobato base en a rechira psicolochica.[6]
O termin "preferencia sexual" ye usata sobre tot por aquels que emparan a fluideza intrinseca d'o deseyo sexual (en o tocant a la verdadera e propria orientación) e que a sexualidat contién cualque elemento de triga, e antimás por qui creyen que no se puet fablar d'una orientación sexual definita dica bella edat, en contraposición a aquels qui piensan que a sexualidat ye determinata por factors cheneticos e/u evolutivos perteneixients, en cada caso a la muito tierna infancia.
Causas e percepción d'a orientación sexual
editarSegunte l'actual conoiximiento cientifico, a orientación sexual se define a ormino durando a primera infancia;[5] no existe, con tot e con ixo, un consenso definitivo entre os cientificos sobre cualas son as razons exactas por que una persona desembolica una orientación sexual heterosexual, bisexual u homosexual.[4][5] Cheneralment, as causas se son rechiratas en una combinación d'influencias cheneticas, hormonals e ambientals, pero no son surtitas prebas definitivas a lo respective;[4][5][7] en o tocant a la opinión espardita seguntes que os abusos sexuals, os succesos traumaticos u una cura u una educación entivocata d'os fillos puedan influir en o desembolique d'a orientación sexual, ista en manca d'evidencia cientifica.[5]
D'atra man, ye amplament compartito entre os estudiosos que a orientación sexual no ye fruito d'una triga,[4][5][7] asinas como no existe garra evidencia de que a orientación pueda modificar-se de traza artificial (a traviés d'as ditas "terapias reparativas"; que, por contra, resultan a ormino negativas ta las personas qui i son chusmesas).[4]
A percepción d'a propria orientación sexual escomencipia a definir-se, de traza cheneral, entre a meya infancia e a primera adolescencia, pero varía enormement de persona a persona e ye independient de l'actividat sexual verdadera e propria: por eixemplo, un individuo puet identificar-se como heterosexual, bisexual u homosexual mesmo antis d'haber-ne habito de relacions sexuals e viceversa.[4] Antimás se considera que a presencia de prechudicio e discriminación en a sociedat constituyen un entrepuz ta que as personas con orientación sexual homosexual u bisexual replequen completament a suya orientación.[4]
Referencias
editar- ↑ Sexual orientation, homosexuality and bisexuality (en anglés). Articlo de l'Asociación estausunidense de Psicolochía (en anglés American Psychologycal Association); consultato o 20 de febrero de 2012.
- ↑ Avoiding Heterosexual Bias in Language (en anglés). Articlo de l'Asociación estausunidense de Psicolochía (en anglés American Psychologycal Association); consultato o 21 de febrero de 2012
- ↑ Concordance Between Sexual Behavior and Sexual Identity in Street Outreach Samples of Four Racial/Ethnic Groups (en anglés). Articlo de Michael Boss, Y. James Essien, Mark Williams e María Eugenia Esquer Fernández. Articlo en o Journal of the American Sexually Transmitted Diseases Association; consultato o 21 de febrero de 2012.
- ↑ 4,00 4,01 4,02 4,03 4,04 4,05 4,06 4,07 4,08 4,09 Sexual Orientation & Homosexuality - Answers to Your Questions For a Better Understanding (en anglés), en American Psychological Association. URL consultato l'8 d'abril de 2012.
- ↑ 5,0 5,1 5,2 5,3 5,4 5,5 5,6 Sexual Orientation and Adolescents (en anglés), en American Academy of Pediatrics. URL consultato l'8 d'abril de 2012.
- ↑ 6,0 6,1 Avoiding Heterosexual Bias in Language (PDF en anglés), en American Psychological Association. URL consultato l'8 d'abril de 2012.
- ↑ 7,0 7,1 Submission to the Church of England's Listening Exercise on Human Sexuality (PDF en anglés), en o Royal College of Psychiatrists. URL consultato l'8 d'abril de 2012.
Datos: Q17888
Multimedia: Sexual orientation / Q17888
