Leninismo

Se conoixe como leninismo á conchunto de aportacions politicas, economicas y filosoficas desenvolicadas por o líder bolchevique Vladimir Ilich Lenin dentro d'o marxismo.

Una d'as aportacións más importants de Lenin estió a qüestión d'a organización comunista. Lenin argumentaba que a luita economica d'a clase obrera sólo que la levaría á alquirir una ideyolochía sindicalista y que a concencia marxista y revolucionaria debían ser ficadas dende difuera. Antimás, emplantillaba que a clase obrera, ta levar a cabo a suya actividat revolucionaria, debeba de contar con una vanguardia revolucionaria que dirichise a suya luita, o Partito Comunista. Seguntes Lenin, os obchectivos d'o partito sólo podrían ser adubius a traviés d'una traza de organización disciplinada conoixida como centralismo democratico. O Leninismo mantiene que o imperialismo ye l'estadio más alto d'o capitalismo, y que o capitalismo sólo puede ser vencido a traviés d'os medios revolucionarios (qualsiquier intento de reformar o capitalismo ye destinau á o fracaso). Lenin creyeba en a destrucción de l'Estato capitalista a traviés d'a revolución proletaria, y en reemplazar á ixe Estato por a dictadura d'o proletariato (un sistema de democracia d'os treballadors y as treballadoras, an os treballadors y treballadoras tendrían o poder politico a traviés de consellos clamados soviets).