Partiu Comunista

Un Partiu Comunista ye un partiu politico que alazeta la suya ideolochía y practicas politicas en o marxismo y a establida de una sociedat comunista. O partiu comunista, a esferencia d'os partius socialistas, socialdemocratas y laboristas (que se i creyan en a segunda mitat d'o sieglo XIX), surte en a primera mitat d'o sieglo XX como resultau d'a I Guerra Mundial (1914-1918), a revolución bolchevique (1917) y, sobretot, por a creyación d'a Internacional Comunista. Ye o resultau d'a división d'os partius integrants d'a Segunda Internacional que s'oposan a la guerra, refirman a revolución bolchevique y se consideran revolucionarios y contrarios a las clamadas tacticas "revisionistas". Como critica a la socialdemocracia y a suya diversidat de opinions y faccions ye a ideya de que o partiu ha d'estar una organización cohesionada y disciplinada, composada por revolucionarios que menan o proceso politico enta o socialismo.

A estrela roya, simbolo comunista.
A falz y o martiello, simbolo emplegau por os partius comunistas.

O primer partiu en afillar iste nombre estió a facción bolchevique d'o Partiu Obrero Socialdemocrata Ruso (POSDR) que en marzo de 1918 (VII Congreso Extraordinario) pasó a clamar-se Partiu Comunista Ruso (bolchevique) ("VKP(b)") ta esferenciar-se d'os mencheviques y atras faccions d'o POSDR.

Más tardi atros partius europeus, que correspondeban a las faccions que refirmaban a revolución rusa, prenioron a denominación. O nombre se fa obligatorio ta os partitos integrants d'a Internacional Comunista dende a aprebación d'as 21 condicions en o II Congreso Mundial celebrau lo 30 de julio de 1920. A quala sinyala que tot partiu miembro debía clamar-se: Partito Comunista de <País> (sección d'a Internacional Comunista) (condición 17ena).

Como norma, dende a III Internacional totz os partius comunistas han d'organizar-se en torno a os principios d'o centralismo democratico. A mas se establixe que ye o Congreso d'o partiu a maxima instancia de decisions, a qual esleye un Comité Central encargau de executar as decisions d'o congreso entre os periodos de reunión d'iste. O Comité Central esleye un Politburó u Comisión Politica mas chicota que s'encarrega de l'administración y decisions diarias d'o partiu, asinas como d'esleyir a o Secretario Cheneral d'o partiu.

En os suyos libros Qué Fer? y Un trango entadebán, dos trangos tazaga, Lenin alazetó as tareas y o modelo d'o partiu comunista. Seguntes ell, o partiu ye o destacamento de vanguardia d'a clase obrera y as suyas sus principals funcions son adhibir a o movimiento obrero as conoixencias politicas marxistas y dirichir a luita contra o capitalismo en totz o suyos aspectos. Una d'as caracteristicas alazetals d'o partito de vanguardia leninista, ye que ye conformau por un grupo de revolucionarios profesionals que representan os sectors más avanzaus d'a clase obrera y d'a intelectualidat.