Guerra de Succesión de Bretanya
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
.svg){kind=small}
.svg){kind=small}
Se conoix con o nombre de Guerra de Succesión de Bretanya (['gera (de) suθe'sjoɳ di bɾe'taɲa] (AFI) (tamién [su.θɪ'sjoɳ] (AFI))) u Guerra d'as Dos Chuanas a una guerra segundaria mientres a Guerra d'os Cient Anyos, escaicita entre 1341 y 1364 y que pretendeba decidir a succesión a o Ducau de Bretanya.
A guerra prencipió en 1341 dimpués d'a muerte d'o duque Chuan III de Bretanya, cuan se disputoron o suyo herencio d'una man, Chuana de Penthièvre (casata con Carlos de Blois) y d'atra man Chuana de Flandres (casata con Chuan de Montfort, chirmán d'o duque difunto). En a suya luita por o control d'o ducau, Chuan de Montfort prestó o suyo homenache a Eduardo III, rei d'Anglaterra, mientres que Carlos de Blois prestó o suyo homenache a o suyo lolo, Felipe VI, rei de Francia, que yeran en conflicto en a Guerra d'os Cient Anyos en haber-se proclamato Eduardo III como rei de Francia.
En prencipiar a guerra, en 1341, os franceses engarcholoron a Chuan de Montfort y proclamoron duque de Bretanya a o suyo candidato Carlos de Blois. Sindembargo, Eduardo III desembarcó con as suyas tropas en Brest en 1342, plegando-se a una tregua declarata en 1343, a tamas que Chuan de Montfort continaba engarcholato y a suya enemiga, Chuana de Penthièvre, se tornó loca.
A guerra continó sin de resolución clara, con momentos de predominio no decisivo ta cadagún d'os contendients, dica 1364, cuan que en a batalla d'Auray os angleses obtenioron una victoria decisiva sobre os franceses y os mercenarios de Bertrand du Guesclin, fendo asinas que se plegase a un tractau, o tractau de Guérande, que proclamó duque de Bretanya a Chuan IV, fillo de Chuan de Montfort y Chuana de Flandres. O primer acto d'o nuevo duque estió a sinyatura d'una alianza con o Reino d'Anglaterra, continando dende ixe inte o ducau de Bretanya a suya partecipación en a Guerra d'os Cient Anyos chunto a lo reino d'Anglaterra.
Datos: Q550172
Multimedia: Breton War of Succession / Q550172
