Gruga (maquina)

Una gruga, grúa u gruba (d'o latín grūs) ye una maquina destinada a puyar y distribuyir en o espacio cargas y materials pa construcción penchadas d'un gancho. A gruga ye d'as primeras maquinas que existioron en o mundo. Por regle general son inchenios que contan con carruchas acanaladas, contrapesos, mecanismos simples, etcetera, pa creyar avantacha mecanica y poder mover grans cargas.

Una gruga

As primeras grugas fuoron creyadas en l'antiga Grecia, accionadas por hombres u animals. Istas grugas yeran utilizadas mas que mas pa la construcción d'edificios altos. Posteriorment, fuoron desarrollando-se grugas mas grans emplegando carruchas pa permitir a elevación de mayors pesos. En l'Alta Edat Meya fuoron emplegadas en os puertos y tarazanas pa a estiba y construcción d'os barcos. Belunas d'ellas fuoron construyidas ancladas a torres de piedra pa dar estabilidat adicional. As primeras grugas se construyioron de fusta, pero dende a plegada d'a revolución industrial os materiales mas emplegaus son o fierro fundiu y l'acero.

A primera enerchía mecanica fue proporcionada por maquinas de vapor en o sieglo XVIII. As grugas modernas emplegan cheneralment os motors de combustión interna u sistemas de motor electrico y hidraulico pa proporcionar fuerzas muito mayors, encara que as grugas manuals encara s'emplegan en os chicoz treballos u a on ye poco rentable disponer d'enerchía.

Existen muitos tipos de grugas diferents, cadaguna adaptada a un proposito especifico. As grandarias van dende as mas chicotas grugas de forca, usadas en l'interior d'os tallers, grugas torres, emplegadas pa construyir edificios altos, dica as grugas flotants, usadas pa construyir aparellos d'aceite y pa rescatar barcos inxupinaus.

Tamién existen maquinas que no dentran en a definición exacta d'una gruga, pero se'n conoixen cheneralment como tals.

Vinclos externos

• Datos: Q178692
• Multimedia: Cranes (machines) / Q178692