Carnaval d'a Fueva

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O carnaval d'a Fueva ye un carnaval popular que se fa en o municipio d'A Fueva, en a comarca de Sobrarbe, en o mes de febrero. En comparanza con belaltros carnavals de Sobrarbe, o carnaval de A Fueva no tiene garra personaches arquetipicos como en son as trangas y as madamas d'o de Bielsa, o Cornelio que se fa montar en a burreta en o de Chistau, ni os cazataires d'o de Torla. Manimenos, se tracta d'una festividat popular en a que cadagún puede presentar-se-ie disfrazau como millor goi le faiga.

O carnaval d'a Fueva ye organizau como una ronda d'as que popularment se fan en as fiestas d'as localidaz de a comarca, pero de forma coordinada d'entre os participants d'as diferents aldeyas y lugars que fan parte d'o municipio, tranzando-se un planning previo d'os lugars y as horas cuan que se gosarán concentrar os participants en cada lugar.

A organización d'o evento corresponde a l'«Asociación Cultural A Redolada d'a Fueva», que cara ta nadal anterior expublica o planning que se i seguirá. Os desplazamientos d'entre os lugars se fan en caravana, con vehiclos privaus que meten os propios participants, en cheneral as cheneracions mas chóvens, mientres que os mas grans se quedan en casa ta sacar a bandeja t'altri (convidar-les a lamins, canapés u gotez de porrón, como ye tipico en as rondas). Isto le da a o carnaval una condición excepcional d'estar itinerant.

A la contra de como se ye fendo istes zaguers anyos o carnaval d'a villa de Bielsa, que s'ha limitau en horario de tardes, o carnaval d'A Fueva como tamién o de Chistau ocupa tot lo día. Ta no solapar-se con os altros tres carnavals «famosos» d'a comarca, se gosa pactar con a organización d'ixes altros o cabo de semana en o que a la fin se fa, derrepartindo-se d'entre toz ellos os cabos de semana disponibles d'o mes de frebero.

Se veiga tamién

Datos: Q20613617