Café vienés
O café vienés (en alemán Wiener Kaffeehaus, en vienés Weana Kafäähaus) ye una institución tipica d'a ciudat de Viena que chuega un important papel en cultura vienesa.
Dende octubre de 2011 a "Cultura d'o café vienés" ye incluyita en a lista de "patrimonio cultural inmaterial" aintro d'a clasificación que fa ta Austria l'"Achencia Nacional ta o Patrimonio Cultural Inmaterial", que fa parti d'a UNESCO. O café vienés se describe por ista organización como o puesto "a on se consumen tiempo y espacio, pero nomás o café ye incluyito en a cuenta."[1]
Cultura d'o café vienés
editar
As practicas socials y rituals y a elegancia d'os puestos creyan una atmosfera muit particular en os cafés vieneses.[2] Ye habitual trobar en istos cafés una ampla variedat de bebitas, prensa internacional y diferents piezas de repostería. Imáchens tipicas d'os cafés vieneses son as mesas de marbre, as cadieras d'estilo Thonet, os revisteros con a prensa d'o día y una decoración interior d'estilo historicista.[3] O escritor austriaco Stefan Zweig describe o café vienés como una institución prou especial,
Zweig atribuye en gran mida l'aire cosmopolita de Viena a la rica información internacional diaria que se ofreixe en os cafés.
En muitos d'os clasicos cafés (por eixemplo o Café Central u o Café Prückel) bi ha musica de piano en dreito por as tardes y se celebran a sobén eventos socials como lecturas literarias. En os meses de verano os clients pueden posar-se difuera en o Schanigarten. A mayoría de cafés ofreixen amás chicoz platos de comida como salchichas u postres y tartas, como as famosas Apfelstrudel, Millirahmstrudel, Punschkrapfen u Linzer torte.
A diferencia d'atras tradicions arredol d'o café en atros puestos d'o mundo, ye totalment normal que un client pase bellas horas solenco leyendo o periodico. Chunto a o café, o cambrero sirve siempre un vaso d'augua y, mientres o client permaneixe en o establimiento se le traye augua si ye menester sin que s'haiga de pedir.
En zaguerías d'o sieglo XIX y primerías d'o sieglo XX, muitos famosos escritors fuoron atrayitos por l'atmosfera d'o café vienés y por los vesitaban a sobén ta reunir-se, charrar y mesmo escribir astí. A famosa obra Die Fackel ("The Torch") de Karl Kraus se diz que s'escribió en gran parti en os cafés de Viena. Atros poetas que pasaban horas en os cafés yeran Arthur Schnitzler, Alfred Polgar, Friedrich Torberg y Egon Erwin Kisch. O famoso escritor y poeta Peter Altenberg mesmo recibiba toz os días o correu en o suyo café favorito, o Café Central.
Historia
editar
A leyenda diz que os soldatos de l'exercito polaco d'os Habsburgo, que luitaban ta liberar Viena d'o segundo setio turco en 1683, troboron bels sacos con uns granos rarizos que en primeras pensaban que yeran comida ta camellos y quisioron cremar-los. O rei polaco Jan III Sobieski dió os sacos a un d'os oficials d'o suyo exercito dito Jerzy Franciszek Kulczycki, qui establió o primer café en a ciudat. Dimpués d'un primer periodo d'experimentación, adhibió zucre y leit, naixiendo asinas a tradición d'o café vienés. Ista fita se remera y reconoixe encara en muitos cafés mudernos d'a ciudat de Viena penchando una foto de Kulczycki en a finestra.[5] D'atra man se diz que Kulczycki, que heba pasato dos anyos preso en mans d'os otomans, conoixeba prou bien lo que yera o café y por ixo convenció a os suyos superiors ta quedar-se con os grans de café que éls consideraban que no teneban guaire valor.[6]
O primer café vienés lo ubrió o griego Johannes Theodat en 1685. 15 anyos dimpués, cuatre griegos teneban cafés en a ciudat y o privilechio de poder servir ista bebida.[7]
A nueva bebida fue prou bien recibita, y os cafés prencipioron a estendillar-se ascape por a ciudat. En os primers anyos as diferents variedaz de café no teneban nombres, y os clients heban de trigar a bebida que quereban prener con una carta de colors.
O periodo de mayor explendor d'os cafés plegó con o sieglo XIX, cuan escritors como Peter Altenberg, Alfred Polgar, Karl Kraus, Hermann Broch u Friedrich Torberg facioron d'éls o suyo puesto preferito d'ocio y treballo. Muitos famosos artistas, cientificos y politicos d'ixa epoca como Arthur Schnitzler, Stefan Zweig, Egon Schiele, Gustav Klimt, Adolf Loos, Theodor Herzl, Alfred Adler,[8] y mesmo Leon Trotsky yeran clients habituals d'istos establimientos. En Praga, Budapest, Cracovia, Lviv y atras ciudaz de l'Imperio Austrohongaro s'establioron tamién cafés d'alcuerdo con o modelo vienés.
En os anyos 1950, prencipió o periodo de decadencia d'os cafés en Viena, y muitos d'os cafés mas famosos fuoron zarratos. Isto se debió mas que mas a la popularidat d'a televisión y l'aparixión d'os mudernos expressos en as tabiernas. Manimenos, encara existen muitos d'os clasicos cafés vieneses.
Cafés famosos
editar
- Kaffee Alt Wien, Bäckerstraße 9.
- Café Bräunerhof, Stallburggasse 2 - O café favorito de Thomas Bernhard en Viena.
- Café Central, en o Palacio Ferstel, dentrando por a Herrengasse 14 (esquina con Strauchgasse) — o café favorito de Peter Altenberg.
- Café Demel, Kohlmarkt 14 - tien a pastelería mas famosa.
- Café Hawelka, Dorotheergasse 6.
- Café Landtmann, Dr.-Karl-Lueger-Ring 4 - o café favorito de Sigmund Freud
- Café Prückel, Stubenring 24 (en a esquina con Dr. Karl-Lueger-Platz).
- Café Sacher, Philharmonikerstraße 4 (café parti de l'Hotel Sacher)
- Café Schwarzenberg, Kärntner Ring 17 (en Schwarzenbergplatz)
- Café Sperl, Gumpendorferstraße 11, o café favorito d'Adolf Hitler.
- Aida, una cadena de cafeterías localizatas por toda a ciudat. Muit baratas comparatas con as otras opcions. Ye popular a cafetería que se troba chunto a la Stephansplatz.
Referencias
editar
Se veigan as imáchens de Commons sobre cafeterías de Viena.
- ↑ (en) Intangible Cultural Heritage in Austria: Viennese Coffee House Culture
- ↑ about.com Viennese Coffee House Culture
- ↑ (de) Patrimonio cultural inmaterial en Austria: Cultura d'o café vienés
- ↑ (en) Robert Edward Norton: Secret Germany: Stefan George and his circle (Google books)
- ↑ (en) Cooperative Coffees, Coffee Timeline
- ↑ Krystyna Bockenheim, Przy polskim stole, Wroclaw 2003, p. 69
- ↑ (de) Teply, Karl: Die Einführung des Kaffees in Wien. Verein für Geschichte der Stadt Wien, Wien 1980, Vol. 6. p. 104. citated in: Seibel, Anna Maria: Die Bedeutung der Griechen für das wirtschaftliche und kulturelle Leben in Wien. p. 94 Se puet trobar online en: http://othes.univie.ac.at/2016/ (.pdf)
- ↑ Hoffman, E. (1994). The Drive for Self: Alfred Adler and the founding of Individual Psychology. Reading, MA: Addison Wesley, pp. 52, 77, 85-86, 101
Bibliografía
editar- Christopher Wurmdobler, Kaffeehäuser in Wien. Ein Führer durch eine Wiener Institution. Klassiker, moderne Cafés, Konditoreien, Coffeeshops. Falter Verlag, 2005. ISBN 3-85439-332-6.
- Béatrice Gonzalés-Vangell, Kaddish Et Renaissance - La Shoah Dans Les Romans Viennois (1991–2001) De Robert Schindel, Robert Menasse Et Doron Rabinovici, Presses Universitaires Du Septentrion, 2005, 328 pages. ISBN 2-85939-900-3
- Michael Rössner (Ed.): Literarische Kaffeehäuser, Kaffeehausliteraten. Böhlau, 1999, ISBN 3-205-98630-X.
Datos: Q261335- Multimedia: Cafés in Vienna / Q261335
