CSS (de l'anglés Cascading Style Sheets) ye un luengache d'estilo que s'utiliza para describir a presentación d'un documento escrito en un luengache de marcación como que HTML.

Un eixemplo de CSS.

CSS ye una tecnolochía fundamental d'a World Wide Web, de conchunta con HTML y JavaScript. CSS ye disenyau para permitir a deseparación d'a presentación y o conteniu, incluiu o disenyo, as colors y as fuents. Ista deseparación puede amillorar l'accesibilidat d'o conteniu, proporcionar mas flexibilidat y control en a especificación d'as caracteristicas d'a presentación, permitir que quantas pachinas web compartan o formato especificando o CSS relevant en un fichero. A deseparación de formato y conteniu tamién fa que sía fesable presentar a mesma pachina de marcau en diferents estilos para diferents metodos de representación, como que en pantalla, en forma impresa, por voz (a traviés d'un navegador u lector de pantalla basau en voz) y en Braille en dispositivos tactils.

CSS tamién tien reglas para o formato alternativo si s'accedeix a o conteniu en un dispositivo mobil. O nombre cascading promana de l'esquema de prioridat especificau para determinar qué regla d'estilo s'aplica si mas d'una regla coincide con un elemento en particular. Iste esquema de prioridat en cascada ye predecible. As especificacions CSS son mantenidas por o World Wide Web Consortium (u W3C). O W3C opera un servicio gratuito de validación de CSS para documentos CSS. Amás de HTML, atros luengaches de marcación admiten l'uso de CSS, incluius XHTML, XML simple, SVG y XUL.