Zeus

Zeus (en griego antigo Ζεύς Zeús) ye, en a mitolochía griega, un dios de qui se diz que ye o «pai d'os dioses y os hombres», que gubernaba a os dioses d'o Mont Olimpo como un pai a una familia, de traza que mesmo qui no yeran os suyos fillos naturals se dirichiban a ell como tal. Yera o Rei d'os Dioses que supervisaba l'universo. Yera o dios d'o cielo y o trueno. Os suyos atributos incluyen o rayo, l'aliga, o toro y o caixico. Amás d'o suyo herencio indo-europeu, o clasico Zeus «recolector de boiras» tamién obtenió bells rasgos iconograficos de culturas d'o antigo Orient Proximo, como o cetro. Zeus fue representau a sobén por os artistas griegos en dos poses: de piet, abanzando con un rayo devantau en a suya man dreita, y posau machestuosament.

Imachen de Zeus

Etimolochía

O teonimo Zeus se remonta a un teonimo proto-indo-europeu d'o que derivan bells cognatos en diferents luengas indo-europeas: o chupiter d'a relichión romana, Tyr Zio d'a relichión escandinava y atros. Alavez, ye a continación griega d'un dios celeste sobirán d'a relichión proto-indo-europea, exponent d'a primera función indo-europea que describe Georges Dumézil.