Silicatos (minerals)

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Os silicatos son un grupo de minerals formatos por silicio combinato con oxicheno formando tetraedros y a sobén aluminio y atros elementos metalicos. En a clasificación de Strunz corresponden a la clase VIII. Os silicatos son os minerals mayoritarios en a crosta terrestre (95 %) , son mayoritarios en as rocas metamorficas, as rocas ignias y en bells grupos de rocas sedimentarias. Tamién son mayoritarios en o manto superior y en as partz externas y meyas d'os planetas rocosos, asinas como en bells asterioides.

Un tetraedro con os atomos d'oxicheno en os vertices y o silicio en o centro, a part més simpla d'a estructura d'os silicatos

Os tetraedros de SiO₄⁴⁺ presentan os oxichenos en os vertices y un catión silicio en o centro; a unión entre o silicio y os oxichenos ye por un enlace con caracteristicas intermeyas entre covalent y ionico.

Dependendo d'a disposición y combinacions entre os diferents tetraedros y os cations que bi haiga entre meyo os silicatos se clasificarán en diferents grupos:

Nesosilicatos, tetraedros sin contacto entre ells pero unitos a cations en contacto con atros tetraedros.
Sorosilicatos, tetraedros unitos en parellas sin contacto entre ellas, pero unitas a cations que tienen contacto con atras parellas de tetraedros.
Ciclosilicatos, tetraedros unitos formando estructuras en forma d'aniello.
Inosilicatos, tetraedros formando rengleras u cadenas que pueden estar simples (piroxens) u dobles (anfíbols).
Filosilicatos, tetraedros formando plans que son apilatos. N'este grupo se troban as micas y os minerals de l'archila.
Tectosilicatos, tetraedros unitos totz con totz en totas as direccions d'o espacio y formando un tarabidato. N'este grupo se troban os feldespatos y o quarz.