Nación
Nación (d'o latín < NATIO)[1] ye un termin mes que mes politico -per un regular ambiguo, impreciso u subchectivo- que designa un colectivo de ser humans con una cerenya identidat compartita, a cual gosa a manifestar-se en a Historia per meyo d'elementos antropolochicos comuns, sobretot socioculturals (como pueden estar a luenga, as creyencias relichiosas u ideyolochicas, diferents manifestacions culturals tradicionals, ecetra.), que per contraposición definen dito colectivo cara t'altros colectivos, y en a mayoría d'os casos con una voluntat de continuidat per meyo d'una definición politica en o contexto mundial. A nación conta cuasi siempre con un territorio mas u menos determinato per as suyas circumstancias historicas, considerato territorio nacional u patria. Os elementos comuns tienen en bels casos tamién una ascendencia u orichen comuns.
En muitas sociedaz, a nivel personal u en bels contextos politico-historicos, o concepto de nación puet estar parello a u intercambiable con es de país, Estato independient, patria u etnia. A ormino, a definición d'un colectivo como nación u a convivencia d'os feitos diferencials de nacions diferents prevoca tensions adintro d'un mesmo territorio politico.
Encara que diacronicament as nacions han existito dende as primeras civilizacions, se considera que a nación como termin politico, devez que os conceptos derivatos de nacionalidat y nacionalismo, rancan d'as zaguerías d'o sieglo XVIII, mes que mes en o contexto europeu.
En o Estato espanyol, o termin nacionalidat que reculle a Constitución de 1978 ye d'ordinario interpretato como un sinonimo de nación que fue esleito en o Congreso d'os Deputatos per razons churidicas, dato que Espanya ye constitucionalment definita como nación.
En l'antiga Unión Sovietica s'esferenciaba lo concepto de nacionalidat civil,(a republica on uno viviba), y a nacionalidat etnica (o grupo etnico on yera a persona). Por eixemplo un ruso d'Ucraina yera considerato de nacionalidat civil "ucrainés" y de nacionalidat etnica "ruso".
Referencias
editar- ↑ (es) Francho Nagore Laín: Vocabulario de la Crónica de San Juan de la Peña (versión aragonesa, s. XIV), Universidat de Zaragoza, 2021, ISBN 978-84-1340-315-1, p.319
