Isoglosa
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Una isoglosa (d'o prefixo griego iso- "igualdat" y de glossa, γλῶσσα, "luenga") ye una linia imachinaria que desepara dos arias cheograficas que se distinguen por un rasgo dialectal concreto, ya sía de tipo fonolochico, lexico u de belatra mena.
As isoglosas no se reconoixen necesariament en divisions d'o territorio basadas en a orografía ni en as administrativas, encara que istas dos divisions haigan puesto incidir en o suyo perfil. Quan diversas isoglosas tienen un recorriu parellano se charra de "faixo d'isoglosas".
Ye freqüent observar l'uso poco riguroso d'o termin isoglosa ta designar as linias que deseparan luengas y dialectos. Dende o punto d'envista lingüistico, manimenos, a sobén no ye posible definir-la con exactitut, ya que s'entiende comunment una luenga como un conchunto de dialectos mutuament intelichibles. Ya que, por un regular, a intelichibilidat entre arias cheograficas ye un fenomeno gradual, puet estar imposible dende o punto d'envista lingüistico deseparar variedatz como as luengas, lo que en no pocos casos orichina decisions basadas en afinidatz politicas y culturals.
Asinas, se diz isoglosa prencipal aquella que coincide con o numero mas gran d'isoglosas y ye marcada como isoglosa lingüistica u dialectal.
