Constitución
Una constitución (d'o latín < CONSTITUTIO)[1] ye un sistema, a sobén un documento escrito, que estableixe as reglas y os prencipios que gubiernan una organización u una entidat politica. En o caso particular d'os estaus, una constitución ye a norma churidica fundamental que define a estructura, os procedimientos, as prerrogativas, dreitos y responsabilidaz d'o gubierno y d'os ciudadans, estando asinas a norma que ocupa la cima d'a Hierarquía normativa d'ixe estau y convertindo-se enla fuent fundamental d'o Dreito d'o dito estau. Antis d'a evolución d'as constitucions nacionals modernas, o termin "constitución" feba referencia a cualsiquier lei important que determinaba o funcionamiento d'un gubierno.
D'as constitucions, se'n fa uso en muitas organizacions, ya sía en organizacions supranacionals (asinas por exemplo en o Tractau por o que s'establixe una Constitución ta Europa), os estaus y las suyas divisions administrativas constituyents, asinas como en os partius politicos, os sindicatos y as organizacions no gubernamentals. As órdens relichiosas se richen tamién por constitucions, que en iste caso son aprobadas por a Santa Seu. Tanimientres, en o caso d'organizacions supraestatals no gosa emplegar-se lo termin "constitución" so que lo termin "tractau", a sobén clamau "tractau constituyent".
Son muitos os estaus que celebran con una festividat oficial o clamau "Día d'a Constirución", que gosa estar un día no laborable y a on se celebran actos oficials.
Referencias
editar- ↑ (es) Francho Nagore Laín: Vocabulario de la Crónica de San Juan de la Peña (versión aragonesa, s. XIV), Universidat de Zaragoza, 2021, ISBN 978-84-1340-315-1, p.138.
Se veiga tamién
editar- Tractau por o que s'establixe una Constitución ta Europa.
- Constitución espanyola de 1978.
- Estatuto d'Autonomía d'Aragón de 1982.
- Anteprochecto d'Estatuto d'Autonomía d'Aragón de 1936.
Datos: Q7755
Multimedia: Constitutions / Q7755
