Aturada de bus

Una aturada de bus u aturada d'autobús ye un elemento urbán, perteneixient a o mobiliario urbán y caracterizau por estar un espacio publico y polivalent d'uso social y colectivo. Se situa en as ceras, a on funciona como modo de referencia fisica visible d'a existencia d'os autobuses de transporte publico y estando o suyo obchectivo l'acceso a o sistema de transporte publico por meyo de l'aturada d'os autobuses pa permitir a os usuarios dentrar y salir d'o vehíclo. Pueden estar cubiertas por meyo de marquesinas pa protecher a os usuarios d'o mal orache como a fredor y a plevia, ya que iste elemento urbán se considera un refuchio de viandants basico (o qualo tién como proposito ufrir as condicions minimas pa a comodidat y eficiencia). Gosan tener elementos de senyalistica, como placas informativas con os numeros y mapas d'o recorriu d'as linias d'autobús que i pasan pa aduyar a os pasachers y operadors d'autobuses a identificar o puesto designau de l'aturada. Tamién pueden tener cartels de publicidat.

Aturada de bus en Zaragoza

As aturadas d'autobús contribuyen a un funcionamiento optimo d'o sistema de fluxo d'o transporte publico, ya que aduya a establir un ritmo especifico en a dinamica viaria urbana: adintro d'a ciudat, o suyo disenyo y morfolochía responde a la relevancia d'o puesto en relación a o contexto urbán a on s'emplaza y, en termins economicos, a suya implementación habría de estar chustificada considerando a demanda de pasachers, os tiempos d'espera, o grau d'exposición a o viento y o mal orache. Dillá d'istos factors, tamién ye menester considerar a facilidat pa os pasachers y operadors d'autobús pa reyalizar o intercambeo pasachero - autobús.

L'aturada d'autobús tién os suyos homologos en atras formas de transporte: l'aturada de tramvía, a gara de metro, a gara de ferrocarril y a estación d'o funicular.

Vinclos externosEditar