Frecuencia

A frecuenzia ye a mesura d'o numero de begadas que s'excayexe bel fenomeno u suzeso por unidat de tiempo.

Eixemplos d'ondas con diferents frecuenzias; se puet oserbar a relazión imbersa entre a frecuenzia y a longaria d'onda.

En unidaz d'o SI, o resultau se mide en Hertz (Hz), unidat dita asinas en onor d'o fesico alemán Heinrich Rudolf Hertz. Una frecuenzia d'1 Hz quiere dezir que o fenomeno se repite una begada cada segundo. D'antes más, ista unidat se conoixeba por o nombre de ziclo por segundo, y encara güé se contina fendo serbir. Atras unidaz que s'emplegan ta medir a frecuenzia son as reboluzions por menuto (rpm) y os radians por segundo (rad/s). Contino s'amuestran as relazions entre istas y o Hertz.

$1\,\,rad/s=2\pi \,\,Hz$

$1\,\,Hz=60\,\,rpm$

A frecuenzia de traqueteyo d'o corazón (u frezuenzia d'o polso sanguinio) se gosa medir en traquitos por menuto u bpm (de l'anglés beats per minute).

A frecuenzia de bel fenomeno se puet calcular contando o numero de begadas que s'ocurre o fenomeno en un entrebalo temporal y alabez, dibidindo o numero por a durada d'o entrebalo. Un atro metodo alternatibo ye medir o entrebalo de tiempo entre dos fenomenos consecutibos (o periodo) y calcular a frecuenzia como l'imberso d'iste tiempo:

$f={\frac {1}{T}}$

an T ye o periodo.