Auto de turismo

Un auto de turismo, automóbil de turismo u simplament un turismo ye un vehíclo automóbil (un auto) con motor y cuatro ruedas que se destina a transportar personas, con no mas de nueu plazas contando-se o conductor.

Os turismos gosan tener carrocería autoportant con chasis integrau y sistemas de suspensión independient pa cada rueda. Manimenos, os vehíclos popularment ditos «4x4» u «tot-terreno», que tamién son turismos a efectos de circulación, a sobén tienen un chasis independient no integrau con a carrocería, y os eixes son solidarios de forma que a suspensión d'una rueda treballa complementariament con a suya colateral, no pas de traza independient.

Por demás, entre os turismos en i ha que tienen o motor adebant, atros que lo lievan dezaga y cualques autos esportivos motor central. Igualment i hai configuracions con tracción debantera, tracción zaguera y a las cuatro ruedas, permanent y conectable. As transmisions pueden estar manuals, automaticas u diferents formas de semi-automaticas. A refricheración d'o motor gosa estar por liquido y con circuito zarrau.

Os motors mas comuns son os de combustión interna, si bien cada vez en i hai mas que son electricos, ixa tecnolochía no acaba de devantar-se. D'entre os de combustión interna, os motors alimentaus con gasolina y os de gasoil (diésel) son os principals, pero en os zaguers anyos tamién s'han feito populars os vehíclos hibridos de combustión y electricos.

Carrocerías

O Renault 4 (lanzau en 1961) fue o primer turismo con portón entero dezaga, por tanto ye una fita de disenyo que lo fa estar o primer «hatchback».

As formas de carrocería que, difuera d'os 4x4 y os SUV, se troba lo mas contino entre os turismos son as tipo berlina (u sedán), que tamién se'n diz «de tres cuerpos», y os autos de tipo «hatchback» / «liftback», que bella vez se fa coincidir con o significau de «compactos». Muitos modelos tamién meten a la venda versions con carrocería familiar u station wagon.

Entre os autos esportivos, predominan a las claras as carrocerías de tipo cupé y descapotables.

Segmentos de mercau

Os vehíclos de turismo se categorizan seguntes «segmentos de mercau», que reúnen os diferents modelos producius por as diferents marcas en conchuntos de caracteristicas apareixidas y, por tanto, son productos comercials que compiten entre si. Asinas, os segmentos de mercau tipicos son:

Segmento A, conoixius popularment como «vehíclos ciudadans» y «compactos urbans». A suya mida no gosa pasar de 3,5 metros y tienen 4 plazas interiors. Son modelos que pertenecen a iste segmento o Peugeot 108, o Fiat 500 u o Toyota Aygo.
Segmento B, que tamién se'n diz os «autos chicoz». A suya mida tipica historicament s'ha trobau arredol d'os 3,5 metros de largura y tienen 5 plazas. Son modelos tipicos d'o segmento B l'Opel Corsa, o Renault Clio, o SEAT Ibiza, o Volkswagen Polo u o Ford Fiesta.

O Citroën GS (1970-1986) yera un auto de segmento C an que s'achuntaba una carrocería liftback, suspensión hidroneumatica de Citroën y un motor de tipo bóxer.

Segmento C u «segmento meyo», con lonchituz d'entre 4 y 4,5 metros y carrocerías hatchback y liftback por un regular (anque i hai excepcions). Son eixemplos tipicos d'o segmento iste modelos como lo Volkswagen Golf, l'Opel Astra, o SEAT León, o Renault Mégane y o Ford Focus.
Segmento D u «autos familiars», con lonchitutz d'entre 4,5 y 4,85 metros. Por lo común tienen 5 plazas interiors. Bel eixemplo d'iste segmento han estau: o Renault Laguna, l'Opel Vectra, o Volkswagen Passat, o Ford Mondeo y o SEAT Exeo. Ye un d'os segmentos que mas ha sufierto l'aparición y cheneralización d'os vehíclos de tipo «SUV», pos a mayoría d'os modelos d'el han acabau por retirar-se y as marcas los han sustituyiu por modelos «SUV».
Segmento E u d'as «berlinas grans», con larguras dende 4,8 dica 4,95 metros. A mayoría pueden lievar a 5 personas pero a sobén son mas achustaus pa fer un viache comodo con 4 por mor de bella caracteristica constructiva, como por eixemplo os casos que tienen túnel central pa dotar-los de tracción zaguera. En iste segmento principian a destacar as marcas que mas tipicament fan autos de representación, como Mercedes-Benz, BMW, Jaguar u Tesla, con modelos clasicos como l'Audi A6, os Mercedes-Benz Clase E, os BMW serie 5 y serie 7, o Jaguar XF y o Tesla Model S.

Un Bentley Continental Flying Spur. As berlinas de luxo (segmento F) son vehíclos que cuentan con un nicho de mercau bien diferenciau d'a resta.

Segmento F u «vehíclos de representación» u «berlina de luxo», pos ixe tipo de carrocería ye a que se dá mas contino. Gosan estar vehíclos disenyaus pensando mas en o comfort d'os pasachers que en o d'o conductor y tienen precios mas altos que os segmentos anteriors. Normalment, ye o segmento an que s'especializan as marcas de luxo. Bel modelo d'iste segmento ye o Mercedes-Benz Clase S, l'Audi A8 y o Jaguar XJ, de marcas que tamién en fan d'os segmentos d'antes, pero tamién son tipicos os vehíclos feitos por marcas especializadas en gran luxo como lo Maserati Quattroporte, o Bentley Continental u os Rolls-Royce Phantom y Ghost.
Segmento S u d'os «autos esportivos», que por as suyas caracteristicas de disenyo no se mezclan con os atros segmentos. Os vehíclos d'iste segmento tamién tienen bellas marcas especializadas.

Se veiga tamién

Datos: Q1402386
Multimedia: Touring car racing / Q1402386