Topo

(Reendrezau dende Tauba)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre o topo. Pa atros emplegos d'a parola topo, se veiga Topo (desambigación).

Un topo (cheneral, sacando en Benás[1] porque «topo» ye un radedor), en Sobrarbe tamién tobonero[2] y toponero[3][4] que coexisten con topo, y en Ribagorza tamién tabonero[1][2] (que ista sí ye la sola parola que s'emplega en benasqués[1]) son os nombres comuns que s'emplega en aragonés pa nombrar as especies diferents de mamiferos que fan vida debaixo de tierra, esforicando matriqueras largas que se diz topineras, y que tienen cualques adaptacions pa fer-lo; como as zarpas debanteras mas grans y recias que as zagueras, pa esgarrapar como palas, orellas diminutas pa que no les dentre a tierra, y os uellos ciegos y bellas vegadas tan atrofiaus que es tienen amagaus debaixo d'a piel.

Ilustración d'un topo d'a especie Talpa europaea.

A especie que mas a sobén recibe iste nombre ye Talpa europaea, o topo común u europeu, pero tamién se puede trobar aplicau a bels atros animals que mesmo pueden no estar soterranios, como os topos d'augua. A mayoría d'animals a os que s'aplica ista denominación son miembros d'a orden Soricomorpha y especialment a familia Talpidae.

Descripción editar

 
Tobonero en a boca d'a suya topinera.

Os topos viven en topineras, d'a on que no en amaneixen si que tansament y contadas as vegadas. Tot lo suyo cuerpo ye feto pa esforicar túnels y vivir debaixo tierra, a on minchan cucos y lombrices por principal.

No tienen uellos vistables, y si en tienen (como por eixemplo Talpa europaea, a especie mas corrient en Europa que sí que en tiene) es tienen chiquinins y amagaus entre o pelo. Tamién as orellas son muit chicas y cuestan de veyer; a razón ye que s'han reduciu pa que no les dentre tierra entre que esbulligan por as matriqueras.

As zarpas de debant son granizas y fieras, desproporcionadament grans si se compara con atros soricomorfos, con unglas recias que creixen contino y una disposición d'as patas debanteras lateralizada dende o huembro. Les sirven pa esgarrapar y excavar, como si estasen espalas, pero no gosan servir pa cosa difuera d'a topinera, por o cual, cuan caminan por o suelo, pareixen aletas inútils. Puet estar que d'astí dimane a exprisión «un andar topino» u estar «atopinau» pa os que tienen malformacions en as garras.

En benasqués editar

En a val de Benás (Alta Ribagorza) a parola «topo» designa inequivocament un mamifero que sía un radedor, como os ratos d'augua[1] por eixemplo. Pa las especies de soricomorfos s'emplega solament a parola tabonero[1] en puestos de topo, anque por contra d'atras variants de l'aragonés, como o chistabín[5] y l'aragonés de Sobrarbe,[3] no disposa d'una parola diferent pa nombrar o cado a on que viven istes animals (topinera) y se diz tabonero tanto a l'animal como a la suya matriquera.[1][2]

Se veiga tamién editar

Referencias editar

  1. 1,0 1,1 1,2 1,3 1,4 1,5 (es) BALLARÍN CORNEL, Ángel, Diccionario del benasqués; Zaragoza, 1978. Consultable en linia a traviés de (an)(es)(en) Diccionario del benasqués. Consultau lo 4 de setiembre de 2018.
  2. 2,0 2,1 2,2 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
  3. 3,0 3,1 (es) TOMÁS ARIAS, Chabier, El aragonés del Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
  4. (es) QUINTANA i FONT, Artur, El Aragonés nuclear de Nerín y Sercué (Valle de Vio); Gara d'Edizions. Zaragoza, 2007. ISBN 978-84-8094-060-3
  5. (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0