Serbos
Срби
Tesla3.jpgCar Dušan, Manastir Lesnovo, XIV vek.jpgNovak Djokovic Hopman Cup 2011 (cropped).jpg
Emir kusturica 72 9643.jpgPrince Lazar (Ravanica Monastery).jpgKaradorde Petrovic table crop.jpg
Nikola Tesla · Stefan Dušan · Novak Đoković
Emir Kusturica · Lazar de Serbia · Karađorđe
Población total
13-14.000.000[1][2]
Rechions con comunidatz importants
Flag of Serbia.svg Serbia
Flag of Bosnia and Herzegovina.svg Bosnia-Herzegovina
Flag of Croatia.svg Croacia
Flag of Romania.svg Rumanía
Flag of the Republic of Macedonia.svg Macedonia
Idiomas
serbo
Pueblos relacionaus
Pueblos eslavos

Os serbos son os habitants mayoritarios de Serbia, y forman minorías en Bosnia-Herzegovina, Croacia, Macedonia d'o Norte y o Banato rumán. Parlan una luenga eslava meridional, o serbo y son cristians ortodoxos.

EtnonimoEditar

 
Serbos con o trache rechional

O etnonimo d'os serbos ye escrito como Σερβlοι (Servloi), Sorabos, Surbi, Sorabi en as fuents medievals primerencas.[3] En De Administrando Imperio se fa mención d'o reino d'un Arcont desconoixiu y os suyos descendients, a dinastía Vlastimirović como Servlia.[4] Se deciba Boiki a la suya tierra mitica, que fan derivar d'o proto-eslavo *bojь. = "batalla", "guerra", "luita", tamién o lugar de Servia en Grecia recibiba lo suyo nombre por os suyos habitants temporals os serbos. D'alcuerdo con o Cuento d'os anyos de Bygone, a primera cronica rusa, os serbos son uns d'os cinco primers pueblos eslavos que yeran enumeraus por lurs nombres.[5]

O cheografo d'o sieglo X Ibrahim ibn Yaqub localizaba o pueblo de "Saqalib" (probablement "eslavos" en cheneral), en as rechions montanyosas d'os Balcans centrals a l'ueste d'os bulgaros y a l'este d'os "atros eslavos" (crovates), doncas en as tierras serbiscas. Os saqalib teneban a reputación d'estar mes furos.[6]

Se fa mención d'os serbos como Srblji en os primers textos eslavonicos. Estos textos tamién fan servir a denominación de tribalians, en realidat un pueblo tracio u ilirián de l'antiguedat que habitaba o sud de Serbia y l'ueste de Bulgaria. A ciudat de Trebinje, capital d'o županato de Travunia yera escrita a sobén Tribalia. "Bojka", o nombre mitico d'a tierra d'os serbos (Serbia Blanca), podría tener una radiz común con a rechión de Boyko, habitada por os Boikos.

En aragonés o etnonimo ye documentau en o Libro de los fechos et conquistas del principado de la Morea, pero como siervos:

Baldoyn era ydo en françia por aduzir gentes pora recobrar su imperio et quel princep Guillem aparellaua mucha gent quiso se proueyr de muchas gentes de armas a su sueldo por defender su tierra et por recobrar la otra tierra que no auia recobrado: et fizo uenir el duch de quara(n)ta(u)[n]a con Mil alamanes et de hongria dos mil hungaros et de seruia mil sieruos et de alanos et comanos quatro mil et todas estas gentes tenia asu sueldo
vidiendo el poder de los Francos & vidiendo qu'el no auia poder para defenderle, fuyo a las partidas de Salonichi, por recobrar & aplegar gentes de sieruos de Blaquos & de Burgaros por defender las ciudades he castiellos de dicho imperio
en la secunda batalla los Hunguaros & los Sieruos;
& despues comandó a los Hungaros & los Sieruos

En a Edat Meya se feba servir o etnonimo servians en francés y anglés , y d'astí a denominación de servianos que veyemos en castellán en os Anales de la Corona de Aragón de Cheronimo Zurita:

Propúsose de parte de Paleólogo que se redujesen en el primer estado las diócesis de la Servia y de la tierra Zagora que sin autoridad del sumo pontífice después que Constantinopla fue tomada, habiendo gran confusión en aquel imperio y estando muy turbadas las cosas de él, concurriendo los búlgaros y servianos juntamente con los griegos para echar y destruir los latinos, por esta causa se mezclaron aquellas naciones entre sí; y siendo entre ellos comunes los matrimonios y casi una misma gente, erigieron la Servia en metrópoli y la tierra Zagora en patriarcado contra los cánones y costumbres de la iglesia como sin voluntad de la sede apostólica

En o periodo otomán os serbos recibioron a denominación de vlacos, por eixemplo os que s'establioron en ciertas partz d'a Bosnia otomana que enantes estioron part d'o Reino de Croacia. Tamién recibioron esta denominación os que s'establioron en tierras despobladas de Croacia y d'Eslavonia baixo administración austriaca.

RelichiónEditar

Dende a suya conversión a lo cristianismo os serbos son cristians ortodoxos, y poseyen actualment una ilesia autocefala propia. Os serbos d'una comarca entre o Kosovo y Macedonia d'o Norte son musulmans. Os musulmans d'o Sanchac de Novi Pazar tienden a no considerar-sen serbos y considerar-sen d'a mesma nacionalidat que os bosnians musulmans. Dica a guerra d'independencia de Bosnia-Herzegovina i heba musulmans bosnians que se consideraban serbos.

HistoriaEditar

EtnochenesiEditar

Os serbos yeran descritos en o libro De administrando Imperio como os habitants d'unos principaus entre os crovates y os bulgaros. Beluns d'estos principaus son descritos en atras fuents como part de Croacia, y Bosnia en fuents posteriors será distinguida de Serbia u d'os principaus serbos. A base d'a organización social d'os serbos yera a zadruga u familia ampla, como en atros pueblos eslavos. Bellas zadruge aplegadas yeran baixo o mando d'un župan ("mainate"). En bells casos bells župani podeban unir-sen y estar en a subchección d'un veliki župan u "gran župan".[7] Rematan predominando dos estaus serbos, Zeta, en l'actual Montenegro y Raška, en o interior, en a zona d'o Sanchac de Novi-Pazar. O cristianismo plega a los serbos dende Agrida, y a conversión remata a fins d'o sieglo IX.

Estau serbisco uniuEditar

Ta más detalles, veyer l'articlo Raškaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

En a segunda metat d'o sieglo XII Esteban Nemanja, Župan d'a Raška, consigue absorber Zeta y fer-se independient de Costantinoble. En 1217 un legau apostolical lo corona rei, pero Serbia continará estando ortodoxa. Sava, un fillo d'Esteban Nemanja que yera monche d'Athos, consigue creyar una ilesia ortodoxa autocefala serbia, y quan n'esdebién arcebispe corona a lo suyo chirmán en 1221 como rei d'alcuerdo con o rito ortodoxo. Ye o principio d'a dinastía Nemanja. Esteban I y os suyos succesors costruirán entre os sieglos XIII y XIV una serie de grans monesterios (Studenica, Decani, etc...).

O reino serbisco d'os Nemanja puet resistir o expansionismo d'os bulgaros y os bizantins, y con Esteban Dušan plega a lo suyo apocheu. Esteban Dušan estendilla o suyo reino por Macedonia y Grecia, plegando a conquerir part d'o Ducato de Neopatria a los almogávars. En 1346 Dušan empenta que Peć esdevenise seu patriarcal, y ixa mesma anyada y en Skopje l'arcebispe de Peć corona a Dušan como emperador de serbos, griegos, bulgaros y albaneses.[8] A creyación d'a seu patriarcal ortodoxa pa os serbos en Peć fa que i haiga un schisma con os griegos bizantins (con seu patriarcal en Costantinoble), dica 1375. Dušan muere en 1355 sin poder conquerir Costantinoble, una anyada més tarde que os turcos otomans conquieren Gallipoli.

Ocupación otomanaEditar

 
Stefan Dušan

Os succesors de Dušan no pueden mantener a unidat d'un territorio tan extenso, que s'esminglana. Os diferents territorios serbos van cayendo u baixo sobiranía otomana u baixo sobiranía d'un reino bosnián en expansión. En 1389 o principe serbo Lazaro Hrebeldjanović ye derrotau en a batalla de Kosovo Polje. O suyo fillo Esteban Lazarevic se sozmete a lo soldán pero demanda l'aduya d'o rei d'Hongría pa poder mantener-se independient. Os hongaros aduyan a creyar en 1412 una plaza fuerte en Belgrado. Dimpués Chorche Branković establix a capital de Serbia en Smeredevo, pero os otomans la prenen en 1439 y en 1459 la ocupan de pa cutio. Serbia esdevién un pachalik otomán y o patriarcato de Peć queda suprimiu dica 1557.

En o periodo de dominación otomana o centro politico d'os serbos se treslada enta o norte, a lo mesmo tiempo que bi ha migracions enta o sud d'o Reino d'Hongría, a lo norte d'o Sava y d'o Danubio, podendo plegar a estar mayoritarios en zonas que enantes yeran habitadas por atros pueblos, (crovates, hongaros, vlacos, ecetra...). En 1521 os otomans vencen a los hongaros en Mohacs, y os serbos emigraus tamién son baixo dominación otomana.

En 1683 os otomans son redotaus en Viena y esto tien consecuencias pa os serbos, como habitants d'una zona que puet dixar d'estar baixo dominio otomán. En 1688 os austriacos prenen Belgrado y dimpués abanzan ta Kosovo, posando en canción a los serbos pa que se rebelasen. Manimenos os otomans reaccionan y os austriacos s'han de replegar en 1689-1690 chunto con 37.000 familias serbas que s'establixen en l'actual Voivodina. En 1694 en plegará atra ondada.

Os otomans fuoron vencius en 1697 y por o tractau de Karlowitz de 1699 abandonan Batchka y lo norte de Sirmia. O patriarca serbisco s'establix en Karlowitz (Sirmia). Os otomans ceden a los austriacos o sud de Sirmia, o Banato y Serbia en o tractau de Passarowitz (1718) dimpués d'atra derrota.

Os otomans contraatacoron en 1736 y por o tractau de Belgrado, Austria habió de tornar-lis Serbia. Por este tractau se creya a muga norte de Serbia, que ya no cambeyará dica a Primera Guerra Mundial.

Totas estas guerras facioron que os serbos emigrasen dende a rechión d'o Kosovo (que dende alavez de conoixe como Viella Serbia) y que o vueito poblacional lo plenasen os albaneses. Beluns d'os serbos que i quedan se convierten a lo islam esdevenindo os gorani actuals. Os serbos no totz os serbos refuchiaus en o reino dš'Austria se quedan en a Voivodina, muitos d'ellos s'establixen en os confins militars: centro d'Eslavonia, sud de Croacia, en o que se conoixerá como a Krayina crovate. En Voivodina os serbos abrán de convivir con repobladors de diferents orichens etnicos a parte d'os serbos: rutens (rusins) eslovacos, alemans, franceses, catalans, (en Nueva Barcelona) etz...

Os otomans posarán a un griego en o patriarcato de Peć en 1739, y lo suprimirán en 1767. En Belgrado bi ha una guarnición de chenizaros que Estambul no controla güaire.

AutonomíaEditar

En 1804 esclata una insurrección en Chumadia dirichida por Karadjordje, que prene Belgrado en 1806 y se fa proclamar en 1808 principe hereu. Os otomans reaccionan pero o soldán ha de reconoixer l'autonomía de Serbia en o tractau de Bucarest firmau con Rusia en 1812. Manimenos en 1813 contina a guerra y os otomans prenen Belgrado, fan mortaleras y Karadjordje s'ha de refuchiar en Austria.

En 1815 Milos Obrenović diriche una insurrección en Chumadia, y baixo a presión de Rusia os otomans acceptan que Serbia siga un principau vasallo, con asembleya (skupstina) y exercito. Os otomans encara mantendrán a un gobernador turco, guarnicions y imposarán o pago d'un tributo anyal.

A primera intervención d'o Imperio Ruso en os Balcans fa que se firme o tractau d'Andrianopolis en 1829. En 1833 Serbia ixampla o suyo territorio por o sud. O soldán reconoix a Milos como principe hereu, y abdica en 1839, pasando o títol a Aleixandre Karadjordjević. En o Tractau de París de 1856 Aleixandre obtién una garantía internacional pa Serbia. A familia Obrenović tornó a lo poder en 1858, pero qui dirichirá o gubierno será o partiu liberal (1867-1893) En 1868 os otomans evacuan as suyas tropas de Serbia.

IndependenciaEditar

Serbia declaró a guerra a lo Imperio Otomán en 1876 quan os disturbios de Bosnia. Encara que os serbos fuoron vencius a lo principio, a fins de 1877 tornan a la ofensiva, favoreixius por a intervención rusa en os Balcans. O tractau de Berlín de 1878 reconoix a independencia de Serbia, que queda examplada con a rechión de Niš. O Sanchak de Novi Pazar queda baixo administración austriaca chunto con Bosnia-Herzegovina pa fer de zona tampón entre Serbia y Montenegro.

Encomienzan os conflictos d'os serbos con atras nacionalidatz balcanicas que tamién se liberaban d'o dominio otomán. A unión de Rumelia Oriental con Bulgaria ye vista como periglosa por a Serbia independient, (distribuita por territorios historicament bulgaros que podeban reclamar en o futuro una Bulgaria més poderosa). Os serbos atacoron a los bulgaros en 1885 y fuoron vencius.

En ixos tiempos ya i heba problemas internos por una sublevación campesina en 1883 y una presión d'un nuevo partiu radical refirmau por os sublevaus. A constitución de 1888 fa de Serbia quasi una monarquía parlamentaria, y a politica posterior bien marcada por a luita entre liberals y radicals, dica un inte que o rei Aleixandre Obrenović restableix l'absolutismo monarquico con a Constitución de 1901, pero ye asasinau en 1903.

O nuevo rei ye Pero I Karadjordjević, que con l'aduya de lo ministro Nicola Pasić, d'o partiu radical, restableix a constitución de 1888 y enforteix os ligallos con Francia y Rusia. En politica exterior Serbia ye obligada a reconoixer l'anexión de Bosnia-Herzegovina por o Imperio Austro-Hongaro y preba d'estendillar-se enta o sud, declarando a guerra a o Imperio Otomán o 18 d'octubre de 1912 chunto con Bulgaria, Grecia y Montenegro, encomenzando a Primera Guerra Balcanica. Os serbos ocupan a part occidental de Macedonia y a mayor part d'o Kosovo y os montenegrins Peć. Serbia pretende tener una salida a la mar a traviés de tierras albanesas, pero o Imperio Austro-Hongaro se i oposa. En o tractau de Londres de mayo de 1913 ye reconoixiu un estau albanés independient pero quedando o Kosovo dentro de Serbia. En chunio os bulgaros encomienzan a Segunda Guerra Balcanica, son derrotaus e por o tractau de Bucarest d'agosto de 1913 a part de Macedonia correspondient a l'actual Macedonia d'o Norte y o norte d'o Sanchac de Novi Pazar son adchudicaus a Serbia.

Primera Guerra MundialEditar

Dimpués de l'atentau de Sarajevo de 1914 organizau por serbos. Austria-Hongría adreza un ultimatum a Serbia, y li declara a guerra o 27 de chulio. O Imperio Ruso refirma a Serbia y encomienza a primera Guerra Mundial. Os serbos no resisten que a lo principio, y reblan. En noviembre de 1914 ya no controlan Belgrado, pero en aviento lo reconquieren. Bulgaria entra en a guerra pa anexionar-se Macedonia, y esto fa que os serbos ya no puedan defender-sen. L'exercito serbián se retira t'Albania y ye evaqüau por os aliaus en Corfú, pa ser adrezaus a lo frent d'Orient dende chulio de 1916. O frent d'orient se creba en setiembre de 1918, y Austria-Hongría se rinde o 3 de noviembre. L'1 d'aviento de 1918 Aleixandre Karadjordjević proclama a formación d'o Reino d'os Serbos, Crovates y Eslovenos.

Os serbos en a Yugoslavia d'entreguerrasEditar

Un comité yugoslavo formau en Londres por dirichents orichinarios d'o Imperio Austro-Hongaro y d'o gobierno serbián de Pasić firmoron o 20 de chulio de 1917 a declaración de Corfú, que preveyeba a unión d'os eslavos d'o sud baixo a monarquía d'os Karadjordjević. O 1 d'aviento de 1918, o fillo de Pero I de Serbia, Aleixandre, proclama o Reino d'os Serbos, Crovates y Eslovenos.

En as prebatinas de redacción d'una Constitución en 1919-1920 se vei de seguida o conflicto entre os centralistas panserbos y os federalistas orichinarios d'o Imperio Austro-Hongaro. O partiu crovate de chent d'a tierra fa boicot a l'Asembleya y Pasić puet conseguir una constitución centralista o 28 de chunio de 1921. En a decenio de 1920 i habrá crisis politicas por o conflicto entre crovates y serbos, (o lider d'o partiu crovate de chent d'a tierra será engarcholau y asesinau).

O 6 de chinero de 1929 o rei Aleixandre disuelve o Parlamento y la constitución de 1921 ye abolida y bi ha dictadura. O reino prene o nombre oficial de Yugoslavia. O 9 d'octubre de 1934 o rei Aleixandre muere en un atentau obra d'os ustaixas. O principe de Pavlo exerce a rechencia. En 1938 se creya una banovina autonoma crovate con tierras de Bosnia-Herzegovina. Os serbos controlan atras partes de Bosnia-Herzegovina.

Segunda Guerra MundialEditar

A principios de 1941 Hitler ordena a Yugoslavia que s'adhiera a lo Pacto Tripartito pa atacar Grecia. O rechent Pavlo accepta pero uns patriotas serbos se sublevan y o 27 de marzo o cheneral Simović obliga a lo rechent a exiliar-se. Pero I ye proclamau rei y denuncia o pacto. O 6 d'abril os exercitos alemans, italians y hongaros invaden Yugoslavia. O 17 d'abril o gubierno se rinde. Os invasors dividen Yugoslavia y se creya una Serbia independient que se reduciba a la serbia posterior a 1878 pero con o Banato Serbisco y sin o districto de Pirot, que s'han quedau os bulgaros.

O cheneral Nedić, ministro d'a Guerra entre 1938 e 1941 dirichiba o gubierno. O Banato Serbisco yera baixo control d'os alemans locals, suabos d'o Danubio. Os chodigos de serbia son elimitaus. Se creya un estau crovate d'ideolochía faixista que ocupa Bosnia-Herzegovina, o Sirmio y a mayor part de Croacia y en o que son eliminaus os opositors y sobretot os serbos, seguntes bella fuent o numero de serbos exterminaus plega a 750.000.

Dende a primavera de 1941 s'organiza una resistencia en o norte d'o Kosovo. Dimpués i habrá dos resistencias. Os chetniks, nacionalistas monarquicos serbos dirichius por o cheneral Draža Mihailović que se negó a capitular en abril y os comunistas dirichius por Josip Broz Tito. En agüerro de 1941 una ofensiva alemana fa que se dividan Mihailović negocia con os alemans y Tito pasa ta Bosnia.

Os chetniks luitan contra os ustaixas crovates y se dedican a fer mortaleras de crovates y sobretot musulmans en as zonas de Bosnia-Herzegovina que controlan. Quan os partisans comunistas iban prenendo importancia os chetniks plegoron fer liga con os ustaixas.

Os partisans comunistas combaten contra italians, alemans y os ustaixas crovates. A fins de 1943 Tito creya en Jajce un Comité nacional de liberación, que será o embrión d'o futuro gubierno federal. Pero II reconoix en 1944 a Tito como jefe d'a Resistencia. Quan l'exercito royo sovietico plega ta Belgrado os partisans ocupan gran parte d'o país. A Conferencia de Yalta en febrero de 1945 planteya que i haiga un compromís o rei y Tito que sería o president. En 1945 os partisans dominan Yugoslavia y o 11 de noviembre a lista unica d'o Frent d'o Pueblo obtién o 90% d'os votos. A monarquía ye abolida y se creya a Republica popular federativa de Yugoslavia.

Os serbos en Federación Yugoslava de TitoEditar

Tito pretendeba evitar que Serbia y os serbos tenesen un peso excesivo en a federación yugoslava y no unificó territorialment a los cristians ortodoxos de luenga serba, que quedoron distribuitos por as republicas socialistas que establió: Republica Socialista de Serbia, Republica Socialista de Bosnia y Herzegovina, Republica Socialista de Montenegro y Republica Socialista de Croacia. Dió categoría de republica a Macedonia, deseparando-la de Serbia y dio autonomía a las rechions con minorías no serbas numerosas como a Voivodina y o Kosovo, on permitió que entrasen nuevas poblacions albanesas.

Pero china chana os serbos iban fendo-se con o poder d'a Republica Federal Socialista de Yugoslavia, y ya en a decada de 1960 os serbos controlaban l'exercito federal.

A unión yugoslava se torna insostenibleEditar

 
Os Balcans en 1998, dimpués d'a guerra

Dende 1986 Slobodan Milošević, d'o partiu comunista de Serbia prene un discurso nacionalista serbisco chauvinista y aproveita a tensión entre serbos y albaneses en o Kosovo, y os ataques albaneses a la minoría serba pa mover sensibilidatz. Os eslovenos y crovates deseyan cada vegada més a independencia.

En chinero de 1990 os eslovenos creban os ligallos con os comunistas de Yugoslavia, y farán o mesmo os crovates.

En 1990 dimpués d'un referendum Serbia prene una constitución que remata con l'autonomía d'o Kosovo y a Voivodina, encara que permite o multipartidismo. Milošević ye esleito president en aviento con o 65% d'os votos.

Os serbos quan s'esminglana YugoslaviaEditar

O 25 de chunio Eslovenia y Croacia proclaman a independencia y encomienza una guerra entre l'Exercito Federal Yugoslavo y las republicas secesionistas. En Croacia l'exercito federal ye aliau con os terroristas locals serbos, controlan as zonas de mayoría serba y fan limpiezas etnicas de población crovate, encomenzando a guerra d'independencia crovate. Os serbos fundan a Republica Serbisca de Krajina.

Dimpués proclama a independencia Bosnia-Herzegovina. En Bosnia-Herzegovina se repetirá o mesmo proceso pero con mayor rapideza y violencia. Os serbos son més numerosos y son mayoritarios en amplas zonas: Bosnia Occidental, Herzegovina Oriental y zonas de Bosnia Oriental mugants con Serbia. A población musulmana y crovate fue forachitada u exterminada de muitas d'estas zonas y las zonas de mayoría serba prenioron continuidat territorial a traviés d'o corredor de Posavina, a costa d'os crovates.

En o Kosovo no bi ha guerra mientres bi n'ha en Croacia y Bosnia-Herzegovina, pero muitas zonas son controladas por os albaneses locals. Macedonia se deseparó pacificament y os serbos no podioron organizar o mesmo procedimiento.

En abril de 1992 Serbia y Montenegro forman una nueva Republica federal de Yugoslavia que no fue reconoixida por a comunidat internacional. A situación de guerra en Croacia y especialment en Bosnia-Herzegovina permite a Milošević enfortir o suyo poder. En as eslecions lechislativas d'aviento de 1993 o Partiu Socialista (en realidat ex-comunista) consigue 123 d'os 250 botos. Bi heba una oposición ultranacionalista y una oposición democratica.

Quan remató a guerra en Bosnia-Herzegovina encomenzó a guerra en o Kosovo con una rapida limpieza etnica, manimenos a OTAN intervinió y obligó a l'exercito serbián a retirar-se'n. Muitos serbos d'o Kosovo han habiu d'ir-se-ne.

ReferenciasEditar

  1. rs.one.un.org
  2. web.archive.org
  3. Istorija Srba, Chapter 5: "Slovenska plemena i njihova kultura"Plantilla:Dicir pachina
  4. De Administrando Imperio, ch. 32
  5. vest vremennih let (Moscow, Leningrad: Akademiya nauk SSSR, 1990), pp. 11, 207.
  6. Islam in the Balkans: religion and society between Europe and the Arab world, by H. T. NorrisPlantilla:Dicir pachina
  7. History of Serbia. Articlo tetulau Balcan States en a edición de l'anyo 2007 d'a Enciclopedia Britannica
  8. Miguel A Ladero Quesada: Historia Universal, Edad Media. Vicens Vives.