Perifrasis verbals d'intencionalidat en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

As perifrasis verbals d'intencionalidat en aragonés expresan a disposición d'o subchecto respecto a un proceso verbal. En aragonés belunas d'as perifrasis d'intencionalidat levan a preposición de, a diferencia d'as perifrasis d'intencionalidat equivalents en castellano y coincidindo con cualques estructuras d'infinitivo d'obchecto en francés como essayer de, décider de.

Son perifrasis d'intencionalidat en aragonés: querer + infinitivo , ir a + infinitivo, decir de + infinitivo, determinar de + infinitivo, mirar de + infinitivo, prebar de + infinitivo, precurar de + infinitivo y estar per + infinitivo.

Querer + infinitivo

A perifrasi querer + infinitivo ye present en atras luengas iberorromanicas y se troba en tot l'aragonés:

• Te querebe fer una pregunta.
• Quereba ser lo caporal.
• Le querebe dar un tocho anoche.
• Quero chetar-me pronto.

Decir de + infinitivo

A perifrasi decir de + infitinitivo se documenta en belsetán y presenta o mesmo significau que determinar de + infinitivo:

• Diciemos de puyar ta Tella.

Determinar de + infinitivo

A construcción determinar de + infinitivo se documenta d'o sieglo XVI en o Libro Verde, y contina emplegando-se por o menos en belsetán, chistabín y benasqués, presenta un equivalent en a construcción francesa décider de + infinitivo:

• Determinaron de tener.
• Determinorez d'ir-tos-ne ta Francia.
• He determinau de fer-lo ahora.
• Han determinau d'encaminar-s'ie.

Mirar de + infinitivo

A perifrasi mirar de + infinitivo u mirar-se de se documenta en aragonés belsetán, chistabín, de Sierra Ferrera, fovano y ribagorzano. Ye d'uso frecuent y presenta un equivalent en o castellano literario ver de. En son eixemplos d'uso:

• Anque sía una mica lento mirar de fer-lo tot el pur que se pueda.
• Mirat d'acudir un poco en hora.
• Mira de meter-lo a nivel.
• ¿ Por qué no te miras de charrar menos y troballar mas ?.

Precurar de + infitivo

A perifrasi precurar de + infinitivo se documenta en belsetán.

• Precura de no tardar guaire.

Prebar de + infinitivo

A perifrasi prebar de + infitinitivo se documenta en chistabín y presenta un significau comparable a mirar de + infinitivo:

• Ha prebau d'apanyar-lo pero no ha puisto.

Tamién se documenta en benasqués, pero coexistindo con atras perifrasis d'o verbo como probar + infinitivo u probar a + infinitivo:

• Vem probar de convencer-lo.
• Proba a vere si puez marchar.

Estar per + infinitivo

A perifrase estar per + infinitivo se documenta en belsetán:

• Yo estoi per fer-lo ansí.

Ir a + infinitivo

A perifrasi ir a + infinitivo ye en realidat una perifrasi verbal temporal, manimenos por tener un caracter temporal futuro prene un caracter modal intencional visible en bel caso:

• ¿ Vas a meter una tienda d'articlos de regalo?.
• Iba a llevantar-me, pero no va poder d'el dolor que teneba.

Bibliografía

• (es) María Luisa Arnal Purroy: El habla de la Baja Ribagorza Occidental. Institución Fernando el Católico, 1998.
• (es) Chabier Lozano Sierra, Ánchel Loís Saludas: Aspectos morfosintácticos del belsetán, 2005, Gara d'Edizions.
• (es) Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010.
• (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978.
• (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN978-84-8094-061-0, p 209, p 375, p 430.
• (an) F. Romanos, F. Sánchez: L'aragonés de A Fueba. Bocabulario y notas gramaticals. Uesca, Publicazions d'o Consello d'a Fabla Aragonesa (col. «Puens enta ra parola», 9) (1999), p 115.