Louis Armstrong
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Louis Armstrong | ||
|---|---|---|
 Louis Armstrong en 1953.
| ||
| Información personal | ||
| Nombre | Louis Daniel Armstrong | |
| Embotada | Satchmo y Pops. | |
| Naixió | 4 d'agosto de 1901 Nueva Orleans (Loisiana, Estaus Unius)
| |
| Murió | 6 de chulio de 1971 Nueva York (Nueva York, Estaus Unius)
| |
| Información musical | ||
| Orichen | ||
| Estilo | Jazz, dixieland y swing. | |
| Ocupancia | Musico y compositor. | |
| Instrumentos | Voz, trompeta y corneta. | |
| Tiempo | 1919 - 1969 | |
| Discograficas | ||
| Relacionau con | Joe Oliver, Ella Fitzgerald, Kid Ory. | |
| Pachina web | www.Satchmo.net | |
Louis Armstrong (Louis Daniel Armstrong), conoixito tamién con as embotadas de Satchmo [1] y Pops, naixito de Nueva Orleans (Loisiana, Estaus Unius) o 4 d'agosto de 1901 y muerto en Nueva York (Nueva York, Estaus Unius) o 6 de chulio de 1971, estió un cantaire y musico (trompetista) de jazz estausunidense, que estió uno d'os inicios d'a transformación d'o jazz en una musica popular y conoixita internacionalment.
Louis Armstrong ganó a suya fama en a suya faceta de trompetista, pero tamién ganó dimpués una mereixita fama como cantaire, estando uno d'os mas influyents cantaires de jazz, con una voz funda y perfectament reconoixible. En zaguerías d'a suya carrera, en os anyos 1960, a suya influencia trescruzó mesmo as mugas d'o jazz con a musica popular d'o suyo país, estando prou reconoixible en cuantos cataires y musicos de musica pop d'ixas envueltas.
As suyas primeras anyadas
editarLouis Armstrong naixió en una familia pobre d'a ciudat de Nueva Orleans, en o estau de Loisiana, o 4 d'agosto de 1901. A suya infancia estió marcata por l'ausencia de su pai, William Armstrong, qui albandonó a familia cuan Louis yera muit chicot. En creixer en un ambient y en un barrio prou difícil, o choven Louis fue ninviato cuantas vegatas a centros ta ninos de color albandonatos (Home for Colored Waifs), encara que no en estar albandonato, sino en razón de chicoz actos de delincuencia. Estando internato en iste centro, aprendió a tanyer o suyo primer instrumento musical, un instrumento que pagó a familia Karnofsky, una familia d'orichen chodigo ruso que s'heba intresato por o choven Louis.
Dimpués, asistió a ormino a las actuacions d'as brass bands, mesmo que ascuitaba a sobén a los musicos d'ixas envueltas, aprendendo asinas d'oyiu de musicos como Bunk Johnson, Buddy Petit y mas que mas de Joe «King» Oliver, qui estió o suyo mentor, plegando mesmo a fer-ne d'o pai que Louis no heba conoixito. Tamién prencipió a tanyer en bellas brass bands en os barcos d'o río Mississippi, en o que estió t'a suya musica equivalent a una "universidat" en a cual inició a suya formación musical. Asinas, cuan Joe Oliver albandonó a ciudat de Nueva Orleans en 1919, Louis Armstrong lo substituyó en o suyo puesto en a orquesta de Kid Ory, que en ixe inte yera considerata como a milor orquesta de hot jazz de Nueva Orleans.
Os inicios d'a suya carrera
editarEn 1922, Louis Armstrong se tresladó enta a ciudat de Chicago, dimpués de recibir una invitación de Joe «King» Oliver ta dentrar a fer parte d' suya banda, dita Creole Jazz Band, que yera a banda de hot jazz con mas influencia en a ciudat de Chicago, que en ixas envueltas (primerías d'os anyos 1920) yera a ciudat capital d'o jazz. Asinas, en 1923 se facioron as primeras gravacions de Louis Armstrong, fendo parte d'a banda de Joe Oliver con a función de segundo trompetista; istas gravacions encluyen bels solos y tamién bellas improvisacions.
Louis Armstrong ya se contentaba con tanyer en a banda de Joe Oliver, pero a suya muller, a pianista Lil Hardin Armstrong, li deciba que li caleba treballar con atros artistas, como meyo ta amillorar a suya carrera artistica. Asinas, en 1924 Louis se deseparó de Joe Oliver (encara que continó mantenendo-ne l'amistat) y se treslado enta la ciudat de Nueva York ta tanyer en a orquestra de Fletcher Henderson, que yera en ixas envueltas una d'os grupos mas conoixitos d'a musica afro-americana. Tamién fació en ixe inte muitas gravacions, que li preparaba uno d'os suyos antigos amigos de Nueva Orleans, o pianista Clarence Williams, incluyindo-ie fragmentos ta orquestas de jazz (mesmo duos con Sidney Bechet, uno d'os pocos artistas que son a o suyo ran en cuanto a tecnica musical) y tamién bels acompanyamientos ta cantaires de blues.
En 1925 tornó enta Chicago y fació gravacions con o suyo nombre, como Louis Armstrong and the Hot Five y Louis Armstrong and the Hot Seven, con exitos como as suyas cancions Potato Head Blues, Muggles (que tractaba sobre a mariguana, un tema sobre o cual Armstrong tenió intrés mientres toda a suya vida), West End Blues u Tight Like This; istas gravacions estioron un punto de referencia en o mundo d'o jazz mientres muitas anyadas, y a suya introducción de trompeta en West End Blues contina estando una d'as mas conoixitas improvisacions d'a historia d'o jazz.
En 1964, Armstrong grabó o disco Hello, Dolly, que incluyiba a canción d'o mesmo nombre una d'as cancions mas famosas y conoixitas y Jeepers Creepers atro tema considerato un clasico. A canción Hello, Dolly estió numero uno en as listas d'Estaus Unius por dencima de The Beatles. Por iste disco Armstrong recibió o Premio Grammy ta o Millor Cantaire Masculín y nominato ta o Millor Disco de l'anyo.
Louis Armstrong tenió problemas cardiacos en 1959, d'os que se recuperó ta seguir tocando. Amstromg continuó tocando dica os zaguers diyas d'a suya vita dica que l'anyo 1971 tenió atra vegata problemas en o corazón descansando dos meses. O 5 de chulio d'ixe mesmo anyo tornó a tocar con a suyo grupo y morió o diya siguent mientres dormía.
Discografía
editar
|
|
Bibliografía
editar- Armstrong, Louis. Satchmo: My Life in New Orleans. ISBN 0-306-80276-7.
- Armstrong, Louis and Brothers, Thomas. Armstrong, in His Own Words: Selected Writings. ISBN 0-553-06768-0.
- Bergreen, Laurence. Louis Armstrong: An Extravagant Life. ISBN 0-553-06768-0.
- Cogswell, Michael. Armstrong: The Offstage Story. ISBN 1-888054-81-6.
- Meckna, Michael. Satchmo: The Louis Armstrong Encyclopedia. ISBN 0-313-30137-9.
- Elie, Lolis Eric. A Letter from New Orleans. Gourmet. Reeditado por Best Food Writing 2006, Holly Hughes. ISBN 1-56924-287-9.
- Jones, Max and Chilton, John. Louis Armstrong Story. ISBN 0-306-80324-0.
- Tirro, Frank. Historia del Jazz clásico. MaNonTroppo, 2001. ISBN 84-95601-12-5.
Referencias
editar- ↑ Acronimo de satchel-mouth.
Vinclos externos
editar
Se veigan as imáchens de Commons sobre Louis Armstrong.- Se veigan as imáchens de Commons sobre Louis Armstrong.
- (en) Satchmo.net, pachina web oficial d'a casa de Louis Armstrong.
- (en) Louis Armstrong en IMDb.
- (en) Discografía de Louis Armstrong.
Datos: Q1779- Multimedia: Louis Armstrong / Q1779
