Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A pastorada ye una representación teatral popular propia d'a provincia de Uesca que se caracteriza por o dialogo en verso que s'establece d'entre os dos personaches principals, que representan dos pastors transhumants (en a forma mas común un mairal y un rapatán) de a montanya altoaragonesa.

Sant Medardo, santo a qui se mira d'honrar recitando as pastoradas en bellas localidaz, como Benavarre (Baixa Ribagorza, Uesca).

A pastorada s'ha representau tipicament ta la fiesta d'os lugars en muitos municipios en as comarcas de Plana de Uesca, Alto Galligo, a Ribagorza, Litera, o Semontano de Balbastro, a Cinca Meya, a Baixa Cinca y os Monegros. Encara que en antes d'a Guerra Civil heba estau muit común, en l'actualidat nomás se representa de forma regular en Capella y en a villa de Benavarre, en a Baixa Ribagorza, a on se recuperó en 1953[1] dimpués d'haber estau prohibida toda la post-guerra, y constituye un d'os actos centrals d'as fiestas [1] y en Panticosa y en Yebra de Basa, en l'Alto Galligo, t'o 25 de chunio, fiesta de Santa Orosia.

Oríchens editar

As pastoradas tienen una orichen relichiosa, y gosan recitar-se ta fer-le honras a un santo, de regular o santo patrón de lugar, razón por a cual son un evento relacionau con as fiestas patronals y suelen representar-se coincidindo con o día d'o santo.

Pareix que a orichen sería un canto votivo a favor d'o santo, a qui, en casos como en a pastorada de Benavarre (Sant Medardo), se'n saca la imáchen t'a carrera en rematar a misa patronal y se le'n recita adebant de todo el mundo. D'alcuerdo con o folclorista Ricardo del Arco (1888-1955), que estudeó profundament a pastorada de Benavarre, ista orichen votiva ye a que determina que as partes inamovibles d'a pastorada (a introducción y a despedida) sian fixas, ya que son as solas que van especificament dirichidas y se recitan de cara a o santo.[1]

En a suya forma clasica, as pastoradas se representan en presencia de as autoridaz eclesiasticas y civils, clasicament o mosén y l'alcalde. D'alcuerdo con bels autors, as primeras pastoradas podrían haber-se desarrollau en o sieglo XVI u mas probablement a lo largo d'o sieglo XVII, pero no se'n tiene eixemplos documentaus dica la pastorada de Besians expublicada en 1738,[1] o texto d'una pastorada mas antigo documentau en Aragón.

As pastoradas pueden fer parte d'o dance u haber-se recitau, de forma tradicional, como evento deseparau. D'alcuerdo con bels autors, as pastoradas podrían estar a radiz d'a on dimanan os dances modernos.[1]

 
Danzants de Santa Orosia.

Interés lingüistico editar

Anque as pastoradas naixón con forma votiva ta fer-le honras a os santos, ya dende as versions conoixidas d'o sieglo XVIII incluyen escenas humoristicas ta fer-las mas atractivas y entreneidas ta la chent, que s'intercalaban d'entre os actos propriament vocacionals con os cuals s'encieta y se remata siempre a obra. En iste aspecto chugan un papel important os dialogos d'entre o mairal y o rapatán, que representan as clases mas baixas de a sociedat tradicional y con frecuencia dos personas foranas a'l lugar (sobre tot en as pastoradas de puestos mas ta'l sud, receptors tradicionals de a transhumancia).

Clasicament y con a intención de reforzar a imáchen de ruralidat de os pastors no ye raro que as partes de dialogo que o rapatán comparte con o mairal se representen en aragonés, u simplament con rasgos imitaus de os parlants d'aragonés u modismos que os naturals d'a localidat a on se representa la pastorada perciben como arcaicos u vulgars, como por eixemplo participios que rematan en -ato de l'aragonés central, y uso de l'articlo masculino "lo" (muit tipico en as pastoradas ribagorzanas).[2] Manimenos o grueso d'o texto sia de gramatica castellana u en castellano con frases sueltas u rasgos puntuals d'aragonés.

Referencias editar

  1. 1,0 1,1 1,2 1,3 1,4 (es) Dentrada «Pastorada» en a Gran Enciclopedia Aragonesa. Zaragoza, 1981.
  2. (es) Chabier Tomás Arias: La Pastorada de Benabén (Baixa Ribagorza). Rolde: Revista de cultura aragonesa, ISSN 1133-6676, Nº. 104, 2003 , páchinas. 25-44