Mosqueruela

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Pa atros emplegos de lo toponimo Mosqueruela se veiga Mosqueruela (desambigación).

Mosqueruela (Mosquerola en catalán) ye un municipio de la provincia de Teruel, situau en la comarca de Gúdar-Chabalambre. La suya población yera de 551 habitants (2018), en una superficie de 265 km².

Mosqueruela
Municipio d'Aragón
Entidat  • País  • Provincia  • Comarca	Municipio  Aragón  Teruel Gúdar-Chabalambre
Partiu chudicial	Teruel
Superficie	265 km²
Población  • Total	538 hab. (2013)
Altaria  • Meyana	1.471 m.
Distancia  • 99 km	enta Teruel
Alcalde	Alba Lucea Papaseit
Codigo postal	44410
Parroquial  • Diocesi  • Arcipestrau	Teruel y Albarracín Mora de Rubielos
Río	Linars
Coordenadas	40°21’41’’N 0°26’56’’U
Mosqueruela Mosqueruela en Aragón

En 1982 Mosqueruela fue declarada Conchunto Historico Artistico.

Cheografía

Mosqueruela ye situada a 1.471 metros d'altaria y a una distancia de 99 km de la ciudat de Teruel, rodeyada de sierras de la part oriental de las serranías de Gúdar.

A pesar de la suya situación en bel meyo de las serranías de Gúdar, la villa ye relativament plana por estar en un polje, d'orichen karstico. Lo polje de Mosqueruela ye actualment ubierto enta l'Este por lo ret fluvial de lo río Mallo, que pasa cerca de lo castiello de Mallo y ye tributario de lo río Seco. Bi ha zonas en lo norte de lo termin de Mosqueruela que desauguan enta lo río de las Truitas, tributario de lo río Alcherez.

Lo termin municipal de Mosqueruela ye muit gran y bi ha unas cuantas sierras y lomas.

En la part occidental lo termin de Mosqueruela plega a lo Collado Frido (2.001 m) de la sierra de Sollavientos. Esta representación de la sierra de Sollavientos chunto con la loma de Mate, Pinar Ciego y una part de la sierra d'el Rayo son despartidas por l'arroyo de los Pellejeros d'atras elevacions menors chunto a la villa aliniadas de sudueste a nord-este: loma de Cabezuelo, loma Arnosa y loma de la Higuera.

En lo nord-este lo termin municipal de Mosqueruela plega dica la sierra de las Defesas en Montlat (1.655 m), despartiu de Navajuelo y la loma d'Adrián por lo puerto de Mosqueruela. En lo sudeste de lo termin se troba la sierra de Mayabona. La part central presenta menos altarias destacables (Milano I con 1.646 m y Milano II con 1.572 m), destacando lo polje y las foces fluvio-karsticas que ha ubierto lo ret fluvial de lo río Mallo.

Lo termin de Mosqueruela ye tan gran que ya dende antigo se dividió administrativament en cuartos u partidas, que dimpués no n'estioron cuatro sino cinco: Val de la Madera, Las Canyadas, Los Carrascales, El Pinar Plano y La Estrella u Peñas Abajo. Las cuatro primeras son particions radials arredol lo nuclio de población y bi ha muitos mases, la cinquena ye especial porque correspone a lo historico termin de lo Castiello del Mallo, y ye a cantos de Los carrascales.

Cadaguna de las cinco partidas podría haber estau lo terreno d'una población si s'hese concentrau l'habitat, pero esto nomás se desvinió con lo barrio de la Estrella, dito La Villeta en Mosqueruela, hereu de l'anterior poblamiento islamico, y dende a on se chestionó toda la partida, con un aldalde pedanio ya en epoca contemporania. En la resta de las partidas floreixió la dispersión de nuclios d'habitat: los mases u masadas.

Mugas

Lo suyo termin municipal muga con Puertomingalvo, Nogueruelas, Val de Linars, Fortanet, Cantaviella y La Iglesuela en la provincia de Teruel, y con Villafranca y Vistabella en la provincia de Castellón.

Fortanet	Cantaviella	La Iglesuela, Villafranca
Val de Linars		Vistabella
Nogueruelas	Puertomingalvo

Historia

Lo poblau iberorromán de San Antonio encara yera poblau en la Edat Meya musulmana. Los musulmans andalusís costruyoron lo castiello del Mallo en l'este de lo termin talment pa aturar l'abance cristiano.

Seguntes Cheronimo Zurita, Alifonso II lo Casto reconquerió en 1181 la zona de l'actual nuclio urbán, y dimpués tendrá importancia como muga con los musulmans, como lugar de paso pa las cabalgatas de saqueyo cristianas que de camín ta la costa, y como un punto de referencia en la conquista de Valencia. De fuents historicas se conoix lo trazau d'un vial, dito calçada de Meder, que mugaba lo termin en la part nord-este. N'esta parte de lo termin i heba chicoz asentamientos ditos Las Posadas de Atorella, Las Casiellas u Las Covas de Petro Exameneç. Las noticias d'este periodo son escasas, Pero II concedió en octubre de 1203 a Arnal Palaciano lo lugar hue desconoixiu de Bos, que los moros diciban Val de Ursera, y que se crei que mugaba con Mosqueruela. Tamién sorprende la donación de lo castiello del Mallo a Gastón de Castellot en chinero de 1204, que no pareix que lo rei controlase.

Pareix estar que en 1234 los mesmos habitants de Mosqueruela conquerioron lo castiello del Mallo. La fundación de Mosqueruela estió en 1265 por orden de Chaime I d'Aragón, pero lo toponimo ya existiba enantes. Perteneixió a la Comunidat de Teruel, dentro de la Sexma d'el Campo de Montagut. En 1286 se concede a Mosqueruela lo dreito a celebrar ferias.

En 1333 s'adhibió oficialment a Mosqueruela lo Castiello del Mallo, dimpués d'un pleito con los de Villafranca. Estió lo primer lugar d'esta comunidat que consiguió la categoría de Villa, en 1366 como premio a la fidelidat a Pero IV d'Aragón.

Toponimia

Las primeras referencias documentals presentan lo nombre latinizau: Mosquerola en 1203, la fuente de la Mosquerola en 1204, Castelli de la Moschorola en 1208. La forma con diftongo tamién la trobamos en lo sieglo XIII.

Agustín Ubieto Arteta diz que la referencia mas antiga de Mosqueruela ye de 1248. En 1270, Chaime I d'Aragón establió:

quod vos, habitatores de Mosqueruela predicti et vestris sucesores in perpetuum heredis hereditatis et posideatis dictos terminos et dicta carta contentos.

No ye la sola Mosquera en lo dominio nabarro-aragonés, porque tenemos microtoponimos como Mosquera en Tudela y Nobiellas, Mejana de Mosquera en Tudela, Mosqueruela en Tudela y Fontellas, Corrales del Mosquero en Exarc de Moncayo. En la zona de Sarrablo y la Tierra de Biescas las Guías Prames situan un microtoponimo pareixiu y con la protesi velar tipica de l'aragonés: Mosquergüela.

En la Ribera Navarra y Taust mosquera significa lugar con arbols a on sesteya lo ganau, significau que se troba tamién en bel lugar de l'Alto Aragón. Rafael Andolz replega la palabra mosquetera con lo significau de puesto fresco, sombra de verano, sombra de bel árbol. En lo caso tudelán podemos pensar en una pervivencia de lo toponimo vascón prerromán Muscaria, encara que no ye guaire claro.

Las sierras de Teruel son zona historicament ganadera. En Mosqueruela bi ha paraches cerca de fuents y ríos con selvetas d'arbols de fuella caduca (triemols, acirons, tilers) entre meyo de lo pinar y lo carrascal predominants; podemos pensar que Mosqueruela significa puesto con sombra a on los pastors feban descansar lo bestiar.

Bi ha microtoponimos con component catalán, como por eixemplo mases que prenen lo nombre por l'apelliu de lo suyo propietario y con component aragonés. Entre los segundos son intresants Las Gerusías/Las Celosías ("Las Chelosías"), Pinar Plano, La Villeta, Barranco de Val Tuerta, Mas Sargantanas, y Val de r'agua, (un caso posible d'articlo ra importau de lo Pireneu).

Demografía

Evolución demografica

1992 1994 1996 1997 1998 1999 2000 2001 2002 - - 719 - 695 692 693 711 721

2003 2004 2005 2006 2007 2008 2009 2010 2011 722 726 703 694 686 631 625 608 625

2012 2013 2014 2015 2016 2017 2018 2019 2020 621 607 601 593 581 558 551 537 532

2021 2022 2023 2024 2025 2026 2027 2028 - 531 551 - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partiu	1979	1983	1987	1991	1995	1999	2003	2007	2011
Partido Popular								3	4
Partido Aragonés								2	2
Izquierda Unida								2	1
Total								7	7

Alcaldes

Lista d'alcaldes

Lechislatura	Nombre	Partiu politico
1979–1983	José Antonio Erruz Foz	UCD
1983–1987	Aurelio Alcón	PSOE
1987–1991	Rufino Marin	PP
1991–1995
1995–1999	Rufino Marin	PP
1999–2003	Rufino Marin	PP
2003–2007	Rufino Marin	PP
2007–2009	Ángel Fabregate Castillo	Partido Aragonés Regionalista
2009-2011	Santiago Escriche	IU
2011-2015	María Isabel Gil Salvador	PP

Molimentos

• Casa de la Villa, de lo sieglo XVII.
• Ilesia parroquial de l'Asumpción, de lo sieglo XVIII.
• Muralla con las suyas puertas.
• Ilesia de Santa Engracia, hue Casa de Cultura.
• L'antigo hespital, sieglo XVI.
• Palacio d'o Rei Chaime, sieglo XIV.

Fiestas

• 29 d'abril, Sant Per Mártir.
• Zaguer domingo de mayo, Fiestas de la Estrella, bi ha una romería ta lo Santuario de la Estrella
• Feria ganadera lo primer domingo de septiembre, que existe dende que Martín I lis concedió lo privilechio de celebración de ferias.

Bibliografía

• (es) José Francisco Casabona Sebastián, Eduardo Gargallo Monforte: Mosqueruela: Guía de monumentos, paisajes, fiestas y servicios turísticos, Instituto de Estudios Turolenses, Teruel, 1999.

Vinclos externos

• (es) Pachina web municipal.
• (es) Turismo Mayestrato.
• (es) Mosqueruela en www.CAIAragon.com.

Lugars desapareixius d'o municipio de Mosqueruela
Arcedo | Atorella | Vidar