Colonización europea d'America

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A Colonización europea d'America prencipia a la fin d'o sieglo XV dimpués de que Cristofo Colombo i plegase en 1492 con o mecenache d'a Corona de Castiella. Dende l'inte, o Reino d'Espanya, y mas tardi os reinos de Portugal, Anglaterra, Francia, y Países Baixos, conquistoron y colonizoron bels territorios y poblacions que ya habitaban en o continent.

Colonias europeas y pueblos orichinarios (sieglos XVI-XVIII)

Os reinos d'Espanya y Portugal estioron os primers en realizar a conquista, y se asentoron prencipalment en Centroamerica y l'aria andina de Sudamerica.

O Reino d'Espanya estió a potencia que mayor presencia colonial imposó en America. Prenió posesión por a fuerza d'os dos grans imperios existents en America en ixe momento, l'Imperio Incaico en l'actual Perú y l'Imperio Azteca en l'actual Mexico, establindo-se en as suyas ciudaz. Dende astí controló una gran parti de Centroamerica, y a zona andina sudamericana dica la zona central de l'actual Chile. En America d'o Norte conquistó a peninsula d'a Florida y os actuals estatos de California, Nuevo Mexico, y atros territorios mas. En o Caribe, dominó sobretot Cuba, A Espanyola, Puerto Rico, Chamaica, entre atras islas.

Portugal colonizó a mayor parti d'a francha costera atlantica d'o norte d'America d'o Sud, que mas tardi sería o Estato de Brasil.

Anglaterra establió trece colonias en a francha costera atlantica nordamericana, antimás de colonizar bellas islas caribenyas y parti de Canadá.

Francia ocupó l'actual Guayana Francesa en Sudamerica (encara baixo lo suyo dominio), Loisiana en o Golfo de Mexico, bellas islas d'o Caribe, y a rechión canadiense de Quebec.

Holanda establió colonias en Nordamerica (Nueva Amsterdam que dimpués sería Nueva York), norte d'America d'o Sud (Guyana holandesa, hue Surinam) y bels asentamientos en islas caribenyas (Antillas Neerlandesas y Aruba).