Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Este articlo trata sobre as celulas eucariotas, ta atros emplegos d'a parola eucariota, se veiga Eucariota (desambigación).

Celulas eucariotas son as celulas que tienen o suyo material heredable (información chenetica) a dintro d'una doble membrana, a membrana nucleyar, que les determina un nuclio celular. Os organismos que son feitos de celulas eucariotas se'n gosa decir eucariotas.

L'alternativa a esta organización celular ye la que tienen as clamadas celula procariota. En ixas atras celulas, o material hereditario ye simplament disperso por dintro d'o citoplasma. A mayoría de celulas procariotas tienen atras envueltas por fuera d'a suya membrana plasmatica, mientres que d'entre os eucariotas no en tienen si que os fongos y as plantas.

Organización editar

En comparanza con as celulas procariotas, as eucariotas tienen o citoplasma muit compartimentado, con organelas deseparadas u cualques vegadas interconectadas, totas ellas bien independizadas con membranas biolochicas que son d'a mesma naturaleza esencial que a membrana plasmatica d'a celula. O nuclio ye lo mas notable y caracteristico d'os compartimentos que trestallan o protoplasma. O protoplasma tiene tres components esencials que son a membrana plasmatica, o nuclio celular y o citoplasma, estando este zaguer a suma d'as organelas, estructuras y o citosol. As celulas eucariotas son dotadas d'un citoesqueleto complexo, muit estructurato y dinamico, feito de microtubulos y filamentos proteicos.

A demás, muitos tipos d'eucariotas tienen paretes celulars, como os fongos u as plantas, o bela atra suerte de cubierta por defuera d'a celula.

Fisiolochía editar

Cuasi totas as celulas eucariotas tienen mitocondrias, as cuals seguntes a Teoría d'a Endosimbiosi, serían o zaguer producto d'una asociación simbiotica escaíta d'entre una bacteria antiga (u bel atro procariota), y d'estas organelas en obtienen a suya capacidat de fer metabolismos aerobios (respiración de l'oxicheno), muito mes afavoreixedors enercheticament. Ye prou important a dependencia cheneralizada d'os eucariotas respecto d'a respiración aerobia que en a gran mayoría d'as especies actuals s'ha perdido a grans rasgos a capacidat de fer metabolismos alternativos (anaerobiosi, fermentacions, ecetra.). Bi ha, a la contra, bels eucariotas que han modificado as suyas mitocondrias en convertindo-las en atras estructuras como os hidrochenosomas.

Cualques atros eucariotas fan a fotosintesi, perque tienen en o suyo citoplasma organelas ditas plastos, que les ne permiten. A mesma Teoría d'a Endosimbiosi tamién en fabla, d'estas organelas, ubicando as suyas orichens en l'asociación de bellas celulas eucariotas con procariotas d'o grupo d'as cianobacterias.

Encara que d'entre as multiples variedaz de celulas eucariotas s'amuestren diferencias que se son a destacar, totas ellas comparten caracteristicas fundamentals d'a suya organización celular, y una sorprendent homochenidat en tot lo que environa la suya bioquimica y metabolismo. Asinas, as celulas eucariotas, y por extensión toz os eucariotas forman un grupo d'organismos fuertement contraposados con os procariotas, os cuals se caracterizan por a suya gran diversidat fisiolochica.

Organismos eucariotas editar

L'articlo prencipal d'esta sección ye Eukaryota.

Os organismos eucariotas son os que forman o dominio Eukaryota (u Eukarya), incluindo-se-ie muitos d'os millor conoixius a dintro d'os cuatre reinos: Animalia (animals), Plantae (plantas), Fungi (fongos) y Protista, os cuals tamién incluyen totas as especies fosils pluricelulars que s'estudian mudernament.

Esquema d'una tipica celula eucariota editar

 
  1. Nucliolo.
  2. Nuclio.
  3. Ribosoma.
  4. Vesicla.
  5. Reticlo endoplasmatico rugoso.
  6. Aparello de Golgi.
  7. Microtubulo.
  8. Reticlo endoplasmatico liso.
  9. Mitocondria.
  10. Vacuola.
  11. Citoplasma.
  12. Lisosoma.
  13. Centriolos.

Se veiga tamién editar