Arco (arquitectura)

Iste articlo ye sobre l'elemento arquitectonico. Ta atros emplegos se veiga arco.

Un arco (d'o latín arcus) ye un elemento constructivo arquitectonico linial de forma curvada, que permite cubrir o espacio vuedo que se troba entre dos pilars u muros d'un edificio. Se composa de piezas dita candals, y puet adoptar formas curvas muit diferents.

Arco d'un puent, Corcega.

También se diz li asinas a las estructuras construyidas actualment con forma arqueyada, encara que sían d'una sola pieza, y que, en os suyos refirmes, funcionan d'a mesma traza que os construyius con candals.

Una vuelta se chenera por a suma d'arcos iguals, situaus ta obtener un elemento constructivo "superficial"; si os arcos son de meyo punto a superficie será semicelindrica.

Una cupula se fa por meyo d'a unión d'arcos iguals que se refirman en una circumferencia; si os arcos son de meyo punto a superficie será semiesferica.

En un puent con uns cuantos arcos o espacio baixo un arco por on pasa l'augua se diz "uello".

En toponimia un "arco" se refiere a sobén a antigos gallipuents.

Tipos d'arcos

Por a suya forma

• Arco abocinau: un arco en o cual la suya amplaria se reduz u se enampla progresivament.
• Arco angular (u arco mitrau). un arco formau por dos segmentos rectos inclinaus que s'unen en o centro en formando un anglo.
• Arco apunchau (u arco ochival): un arco formau por dos segmentos d'arco que forman un anglo central en o suyo candaliello.
• Arco carpanel: un arco rebaixau a on se li adhiben chicoz arcos en os suyos extremos, en tener dos centros d'os cerclos.
• Arco catenario: un arco con o suyo perfil en forma d'una linia catenaria invertida.
• Arco ciego: un arco emplegau en una paret u muro nomás que como elemento decorativo sin garra atra función.
• Arco conopial: un arco apunchau con un descote en o suyo candaliello que amuestra un vertiz enta l'alto.
• Arco curvau (u arco rebaixau): se tracta d'un arco con un cerclo lo centro d'o cual se troba baixo d'a linia d'as impostas.
• Arco de descargue, un arco ciego en un muro de carga que fa lo descargue d'as tensions d'o muro sobre un vuedo.
• Arco de ferradura: un arco a on o centro d'a circumferencia se troba sobre la linia d'as impostas con una forma que remera una ferradura.
• Arco de meyo punto: ye un arco a on lo suyo intradós forma un semicerclo.
• Arco diafragmatico: un arco colocau transversalment en un edificio en forma succesiva permetendo lo descargue d'as tensions en forma mas eficient sobre los muros laterals.
• Arco entrelazau: un conchunto d'arcos sobre columnas cruzaus entre éls como elemento decorativo.
• Arco faixón: arco transversal a la nau de l'edificio que sustenta una vuelta de canyón.
• Arco falso (u arco maya): formau en colocar a los cantos d'un vuedo bloque de piedra picada u atros materials escalonaus dica que se troban en o centro, formando una falsa voveda.
• Arco festonau: un arco con un intradós decorau con festons u ondulacions convexas.
• Arco formero: un arco situau paralelament a l'eixe lochitudinal d'a nau de l'edificio que se troban de pilar a pilar en coincidindo con as vovedas.
• Arco maya (u arco falso): formau en colocar a los cantos d'un vuedo bloque de piedra picada u atros materials escalonau sdica que se troban en o centro, formando una falsa voveda.
• Arco mitrau (u arco angular). un arco formau por dos segmentos rectos inclinaus que s'unen en o centro en formando un anglo.
• Arco mixtilinio: un arco que combina linias rectas y curvas en a suya figura.
• Arco ochival (u arco apunchau): un arco formau por dos segmentos d'arco que forman un anglo central en o suyo candaliello.
• Arco parabolico: una traza d'arco en forma de parabola.
• Arco peraltau: un arco de meyo punto en que la suya curvatura prencipia dencima d'a linia d'imposta, en adhibir-le-ie candals sobre la linia d'a impostura.
• Arco polilobulau: un arco formau por chicoz arcos de meyo punto en forma de lobulos.
• Arco rampant: un arco carpanel asimetrico, que tien os suyos sooprtes a diferent livel.
• Arco rebaixau (u arco curvau): se tracta d'un arco con un cerclo lo centro d'o cual se troba baixo d'a linia d'as impostas.
• Arco toral: cadaguno d'os cuatre arcos sobre los que se debanta una cupula u un crucero.
• Arco Tudor: un arco rebaixau a on se li adhiben chicoz arcos en os suyos extremos, en tener cuatre centros d'os cerclos.
• Arco trifoliau (u arco trilobulau): una variant de l'arco polilobulau con nomás que tres lobulos.
• Arco trunfal: arco que comunica en una ilesia la nau con o presbiterio u con l'abside.

Por os materials de construcción

• Arco en disolución: ye un arco que gosa estar un arco de meyo punto con vuelta de canyón a on que los ladriellos que se fan servir son de sal unius con mortero; en disolver-se la sal con a plevia queda nomás que l'esscleto de mortero.

Por a suya función

• Arco de descargue: se tracta d'un arco ciego en una paret de carga la función d'o cual ye lo descargue d'as tensions lateralment, a ormino situau dencima d'un atro arco en o cual s'ubre un vuedo en a paret.
• Puent d'arco: un puent a on que las tensions de carga se derivan a traviés d'arcos enta los laterals u enta pilars.

Galería d'imáchens

• 
  Arco abocinau en a ilesia de Sant Chil d'Argenton-les-Vallées (Francia).
• 
  Arco apunchau u ochival y abocinau en a ilesia de Santa Walburgis de Veurne (Belchica).
• 
  Arco angular u mitrau en una cabana en Talas en o País Valenciano.
• 
  Arco de meyo punto en o Teatro griego de Dodona en Grecia.
• 
  Arco rebaixau u arco curvau en a dentrada a una gara d'o metro de Nueva York en Estaus Unius.
• 
  Arco carpanel en o Museu de Zaragoza procedent d'o convento de Santo Domingo de Zaragoza en Zaragoza (Aragón).
• 
  Arco Tudor en o Palacio Fulham en Londres (Reino Uniu).
• 
  Arco conopial en a seu d'Alexandre Nevski de Tallin en Tallin (Estonia).
• 
  Arco de ferradura en o Palacio de l'Alchafaría en Zaragoza (Aragón).
• 
  Arcos mixtilinios en o Palacio de la Salina en Salamanca (Castiella y Leyón).
• 
  Arco de descargue en un edificio en Cherusalem.
• 
  Arcos ciegos en a ilesia de Sant Bertolomeu de Bauzens en Francia.
• 
  Decoración en forma d'arco catenario en o Marquette Plaza de Minneapolis (Estaus Unius).
• 
  Arcos diafragmaticos en o monesterio de Poblet en Catalunya.
• 
  Arco parabolico en a ilesia d'a Purisma Concepción de Monterrey, en Monterrey (Mexico).
• 
  Arcos faixons en l'abadía de Vézelay en Francia.
• 
  Arco maya (u arco falso) en o Sultan Ghari en Delhi (India).
• 
  Arco festonau en o Fuerte d'Amber en o Rachastán (India).
• 
  Arco formero en o monesterio de Santa María la Reyal de Sacramenia en Sacramenia (Segovia, Espanya).
• 
  Arco polilobulau en a mezquita de Ladysmith (Sudafrica).
• 
  Arco trunfal en a Basilica de Sant Pavlo Extramuros en Roma (Italia).
• 
  Arcos entrelazaus en a seu de Canterbury en o Reino Uniu.
• 
  Arco rampant en Pontoise (Val de l'Oise, Francia).
• 
  Dibuixo d'un arco peraltau.
• 
  Edificio en Castelló d'Empúries (Catalunya) con un arco trilobulau que tamién ye arco conopial.
• 
  Debuixo d'arcos torals.
• 
  Puent de Piedra de Zaragoza, un puent d'arcos en Zaragoza.
• 
  Puent de Sasa de Surta, sobre lo río Vero, un puent d'arco en estilo romanico.

Vinclos externos

• Se veigan as imáchens de Commons sobre os arcos.