Os anglos d'o viento son as diferents orientacions que mantiene una embarcación a vela respecto a la dirección d'o viento.

Os diferents anglos d'o viento. A flecha negra en a parti superior representa a dirección d'o viento.

A propulsión en as embarcacions de vela se produce por un fenomeno parellán a la sustentación d'una ala d'avión, a diferencia de presión chenerata por o viento en as dos "caras" d'a vela. Cuan cambeya a dirección d'o viento respecto a l'eixe lonchitudinal d'a embarcación obliga a o navegant a cambear d'amura a vela d'a embarcación ta aproveitar millor a fuerza d'o viento sobre as velas.

Ta indicar a dirección d'o viento respecto a l'eixe lonchitudinal d'a embarcación se desembolicó un sistema convencional que divide l'anglo entre prova y popa d'o barco (que corresponde a 180º) en 16 cuartos, que corresponden a 11° 15' cadaguna.

Asinas, convencionalment a dirección d'o viento s'espresa en cuartos, proporcionando una indicación imediatament comprensible entre o patrón d'a embarcación y os mariners, ta os achustes que s'haigan de fer en as velas.

En a imachen d'a dreita se pueden veyer os diferents rumbos que puet seguir a embarcación seguntes a dirección d'o viento.

  • 0) Prova a o viento: O viento dentra a la embarcación dreitament por a suya prova. Nunca no se puet navegar con iste rumbo ya que a vela queda floixa y no pilla viento, ye decir ye imposible navegar dreitament contra o viento.
  • 1) Cenyida: En iste rumbo o viento dentra por una d'as amuras d'a embarcación y t'aproveitar-lo s'han de zarrar as velas o maximo posible, mas contra mas se quiera cenyir, por lo que se fa mas dificil navegar. Si se quiere navegar chusto en a dirección por a on plega o viento a unica traza de fer-lo ye navegar fendo cenyidas en zig-zag.
  • 2) Traviés: Ye o rumbo mas fácil ta navegar, y ye cuan o viento plega por cualsiquiera d'os dos costatos d'a embarcación. Se navega a 90º d'a dirección d'o viento y as velas se levan meyo ubiertas.
  • 3), 4) y 5) Largo: O viento dentrará en iste caso por una d'as aletas d'a embarcación. As velas son encara mas ubiertas que en o rumbo de traviés y ye o rumbo en que a embarcación pilla mas velocidat.
  • 6) Empopada: En iste caso o viento dentra dreitament por a popa. As velas son ubiertas de tot, perpendiculars a o casco y se pueden levar una a babor y un atra a estribor (u en o caso d'una sola vela en cualsiquiera d'os dos costatos).

Se veiga tamién editar

Vinclos externos editar