Diferencia entre revisiones de «Cofradía del Descendimiento de la Cruz y Lágrimas de Nuestra Señora»

Dende [[1963]] cambeo lo día de salida d'a cofadría a lo [[Chuebes Santo]]. Mientres de toz istos años nomás se saliba un día d'a Semana Santa, dica [[1968]] cuanquan l'arzobispato premitió salir tamién en a prozesión d'o Santo Entierro. Ya en [[1972]] se creyó a prozesión d'as Glarimas o día de Martes Santo en a que se fan zinco predicazions e se canta zinco [[Jota aragonesa|jotas]] a la Birchen. Antimás dende iste mesmo año as mullers tamién pueden partizipar en cualsiquier sezión d'a cofadría.

*''Paso del Descendimiento de la Cruz'': representa la baxata d'a cruz de Chesús dezaga d'a suya muerte. Ye una d'as esculturas más importants d'o [[sieglo XIX]] en [[Aragón]]. Estió a chirmandat d'a [[Muy Ilustre, Antiquísima y Real Hermandad de la Preciosísima Sangre de Nuestro Señor Jesucristo y Madre de Dios de Misericordia|Sangre de Cristo]] a que mandó fer o conchunto escultorico, ya que os anteriors pasos que ista teneba estioron destruyitos en a [[Guerra d'a Independenzia espanyola]], cuanquan os franzeses bombardioron o combento de San Franzisco o [[10 de febrero]] de [[1809]] a on teneba a seu a chirmandat. O escultor esleito estió José Alegre por un pre de güeitomil reyals de bellón, mil reyals por cada una d'as feguras que forman a obra en o suyo primer bozeto. As cuatro primeras feguras yeran rematatas o [[4 de mayo]] de [[1848]]: Cristo, un choben sobre a Cruz, un ombre biello sobre a Cruz e San Chuan, por o que le se pagó a lo escultor cuatromil reyals. As siguients feguras que se fazioron estioron Nicodemo e dimpués a Birchen María e [[Santa María Malena]]. A la fin o [[8 de mayo]] de [[1851]] li se perpagó por a setiena e zaguera fegura que fazió lo escultor. L'autor s'ispiró en a obra de [[Peter Paul Rubens|Rubens]] que bi ha en catedral d'[[Ambers]]. O conchunto final ye formato por dos grupos, estando a cruz l'exe zentral. En o primero bi ye un ombre alto, talment [[Longinus]] seguntes os [[ebanchelios apocrifos]], en l'atro brazo d'a cruz [[Chusé d'Arimatea]], Chesús en a cruz e abaxo [[Nicodemo]] e [[San Chuan]]. D'atra mán i son a Birchen e María Madalena formando o segundo grupo escultorico. En [[1940]] a ''Real Congregación de Nuestra Señora y San Luis Gonzaga'' s'encarga d'iste paso, que yera propiedat d'a Sangre de Cristo, creyando-se a cofadría como filial d'a dita chirmandat. En [[1944]] o paso estió restaurato por os chirmans Albareda.