Sal

Iste articlo ye sobre a sal como alimento. Ta atros emplegos d'o termín se beiga sal (desambigazión)

A sal de cozina, u dita más á sobent simplament sal, ye un apaño u aditibo alimentario formato prenzipalment por una sal, o cloruro de sodio, a formula quimica d'o cualo ye NaCl. Atras denominazions á sobent emplegatas son sal común, sal marina (cuan probiene d'a mar), sal fina u sal de mesa (cuan ye refinata e reduzita á polbo), u sal gorda, de gran menos fino, ta o suyo uso prenzipalment culinario.

Un salero plen de sal

Ye l'apaño más antigo que ha feito serbir a umanidat e tien tanta importanzia ta la bida umana que ha marcato lo desembolique d'a istoria. L'orichen d'a parola "salario" ye estreitament ligato á la sal.

Chazimientos e salinas

Mena de sal en Cardona (Baches)

Istoricament a espleitazión de sal s'ha reyalizato en salinas d'as zonas costeras e d'os manantials d'augua salata (cursos soterraños que trabesan depositos de sal), asinas como por meyo de menas.

En Aragón a mena más important de sal se troba en Remolinos que esisten dende epoca romana u encluso d'antis más. A produzión añal de sal de mesa ye de 14.000 toneladas/añals, encara que en total se quitan bellas 400.000 toneladas por año ta o consumo animal e deschelo en carreteras (un 70%), estando a interpresa que espleita la mena de Remolinos, Ibérica de Sales, líder d'o mercato estatal. Son conoxitas tamién as salinas de Nabal que encara alzan o tradizional sistema d'estrazión d'a sal.

En a Edat meya á más bi eba salinas en Abanto, Aguilaníu, Alcalá de la Selba, Alfambra, Aliaga, Arcos, Billel, Burcharaloz, Calatayú, Castellar, Chuseu, Daroca, Íxar, Monterd, Peñalba, Pina, Sarrión, Segura de Baños, Taust, e Almudín, en Zaragoza..

Se beiga tamién

• Se veigan as imáchens de Commons sobre a sal.
• Cloruro sodico
• Sal (quimica)