Diferencia entre revisiones de «Bruixa»

Contenido eliminado Contenido añadido
maxia u machia??
(Garra diferencia)

Versión d'o 22:38 20 chi 2008

As bruxas u broxas son as persona que s'adedican á la bruxería u á bels tipos de machia. Anque güé bi ha personas que s'autocalifican de bruxas u bruixots en un sentito positibo d'o termín, istoricament as bruxas, reyals u imachinarias, han estato fuertement perseguitas, acusatas de pautos con o Diaple e de tota mena de maldaz. En a Edat Meya, muitas mullers estioron crematas acusatas de estar bruxas.

Bruxas

D'atra man, o personache d'a bruxa tamién ha estato una fuent de mitos e tradizions en a cultura popular de muitos países.

Os ombres que prauticaban a bruxería, muitos menos que as mullers en Aragón, yeran ditos bruxos en l'Alto Gallego e bruxons en atros puestos como Sobrarbe.

Bruxas e bruxos en Aragón

Anque as bruxas e bruxos yeran conoxitos popularment en muitas ocasions como chent que conoxeba plantas medizinals ta curar malautías d'o ganato e d'as personas tamién bi abió casos de condenas por bruxería por parti d'a Enquesizión en Aragón. Asinas bruxas como Domencha a Coxa, Margálida Escuder, Gracia la Nadala, La Narbona, Juana Bardaxí u Benedeta la Piquera e bruxons como Pedro Arruebo, Juan Gayán u Miguel Guillén aparixen en decumentos d'a Santa Enquesizión. Ta ista instituzión bels siñals de bruxería yeran l'uso d'ingüentos e conxuros machicos que les feban bolar, relazions con o Diaple u o conoximiento e posesión d'o dito en l'Alto Aragón "O Libret" u "Libro de San Ziprián". Tradizionalment yera o debinaire quí teneba la propiedat de dezir quí yera u no bruxo u bruxa.

As falordias populars dizen que as bruxas se tresladaban d'un puesto t'atro aintro de bulturnos u aires cornutos arredol d'as tronadas. En muitos lugars d'o Perineu se construyiban os esconchurador, puestos dende á on o mosén d'o lugar feba zerimonias contra as bruxas e as tronadas que yeran asoziatas con istas.

Atro elemento tipico de l'Alto Aragón son os espantabruxas d'as suyas casas. Se meteban en l'alto d'as chamineras ta que as bruxas no i pasasen. Tamién se feban cruzes sobre a zenisa d'as brasadas u se meteban as estenazas en forma de cruz. En as puertas d'as casas se penchaban tot tipo d'amuletos contra bruxas e bruxons.

Una propiedat que se deziba teneban istas personas yera la de poder combertir-sen en animals, á ormino gatos, llebres u crabas. En Sobrarbe tamién se diz que se combertiban en corbasos e bueitres e en atros puestos tamién en alicas u sirpients alatas.

Puestos de reunión

Bi ha muitos puestos arredol d'a cheografía aragonesa á on se diz popularment que se reuniban e feban danzas as bruxas e os bruxons con o Diaple. Istas reunions yeran ditas chuntas e entre atros puestos se feban en o puntón d'Asba en a Sierra de Guara, o Turbón, a Maladeta, Cotiella, as peñas d'o salto d'o Roldán, as cuebas de Chabes e Solenzio en Bastarás, o Cabezo d'as bruxas e o prado de Bielsa en l'Aínsa, a Caseta d'as Bruxas en Biescas e en Labuerda, o Castiello de Boltaña, o Castiello de Pegar en Alins, o Balcón d'as Bruxas en Tamarit, a Peña d'as Bruxas en Plan a plaza d'Ansó u o fosal de A Espuña. O nombre popular ta istos lugars yera lannas, praus u eras d'o buco u d'o boc fendo referenzia á lo Diaple.

Se beiga tamién