Nombre popular d'un ser vivo

O nombre popular, nombre vernaclo, coloquial, trivial u vulgar d'un ser vivo ye o nombre que se le da a una especie entre una sociedat u comunidat humana concreta y que ye diferent de o nombre scientifico.

«Cuco» ye un eixemplo de nombre popular d'animal que designa a lo que son un numero d'especies no relacionadas dende a envista scientifica, lo que fa imposible asimilar-lo a o nombre scientifico d'un taxón.

O nombre popular designa regularment a una especie, pero tamién puede estar chenerico y fer referencia a un concepto apreciable entre os miembros de la dita comunidat, carents muitas vegadas de conoiximientos scientificos, y basar-se en tretos que no sían scientificament aplicables a garra especie concreta, sino más bien a tot un conchunto d'ellas. Por ixo, bellas vegadas as especies que reciben un mesmo nombre vulgar no corresponden sisquiera a un mesmo taxón scientifico.

Por unatro costau, un nombre popular puede estar d'aplicación a una colla concreta d'eixemplars d'una especie, en función de caracters superficials como a suya edat (cadiello, caloyo, fraixenco, ranueco, etc.), sexo (mardano-ovella, buco-craba, verrano-latona, etc.), aparencia fisica (palomo, soro, tordo, muino, caracolero, alaigo, etc.)... criterios que tampoco no son aplicables a la clasificación y nomenclatura scientificas.

Dende a envista lingüistica, os nombres populars solen estar vulgarismos u a lo más semi-cultismos ligaus a las leis foneticas de l'idioma en qüestión. As pocas vegadas que un nombre popular gosa estar d'orichen culta se tracta de nombres scientificos que s'ha adaptau y normalizau ta l'idioma, en partindo dende o conoiximiento scientifico y un etimo que ye por antonomasia en latín, como pasa con determinaus nombres de familias biolochicas d'organismos y os correspondients a atros taxons de categorías superiors.

Se veiga tamién

• Nombre scientifico.
• Clasificación scientifica.
• Grupo polifiletico.
• Grupo parafiletico.