Parafilia (filochenetica)

En Filochenia, a parafilia ye la qualidat principal d'un grupo d'organismos que descienden d'un antipasau común, que tamién fa parte d'o grupo pero no totz os suyos descendients i son. A parafilia d'un taxon pasa quan a un clado verdadero u grupo monofiletico se le'n saca bells miembros, por conveniencia d'a clasificación scientifica u por tradición taxonomica. L'adchectivo con que se nombra un grupo con parafilia ye parafiletico.

Os reptils son un taxon historico que s'ha mostrau parafiletico.

A clasificación tradicional d'os organismos ye plena de taxons parafileticos, como por eixemplo as plantas pteridofitas, os invertebraus u os ponchidos. A mayoría d'istes taxons se formón en o suyo inte por simple exclusión: as pteridofitas son as plantas vasculars que no son fanerogamas, os invertebraus son totz os animals que no son vertebraus, y os ponchidos son totz os primates antropoides no hominins.

A conveniencia d'emplegar taxons parafileticos u no encara se discute. Os scientificos que son favorables gosan considerar que son grupos con una mesma orichen evolutiva y unas caracteristicas ancestrals (plesiomorfias) bien definidas. Os suyos detractors dicen, por contra, que no tienen sentiu en sacar-se-ne miembros con criterios alto u baixo arbitrarios.

En as clasifiacions en as que encara se'n emplega, o que se sole fer ye marcar a naturaleza parafiletica de o taxón escribindo lo suyo nombre entre cometas u con una (P) dezaga, por eixemplo, "Radiolaria" u Protalveolata (P). En qualques publicacions, se marcan con un asterisco dezaga d'o taxón: Reptilia*.

Se veiga tamién

• Monofilia (filochenetica).
• Cladistica.
• Filochenia.
• Plesiomorfia.
  • Simplesiomorfia.
• Apomorfia.
  • Sinapomorfia.