O '''fauvismo''' ye un estilo pictorico, d'orichen francés, caracterizato per l'uso de colors intensas, puras y expresivas, y per una simplificación d'as formas, as perspectivas y as [[uembra|uambra]]s. Estió lo primero d'os prencipals movimientos pictoricos expresionistas apareixitos ta las primerías d'o sieglo XX, si bien no tenió guaire durada.
O movimiento ganó importancia en rancando d'a exposición de bells '''fauvistas''' en o Salón d'Agüerro (Salon d'Automne) de 1905, en París. L'orichen d'a denominación se troba en a frase d'o critico francés Louis Vauxcelles, qui exclamó "[[Donatello]] au milieu des fauves!" (Donatello entre as bestias furas!), referindo-se a una escultura d'estilo quatrecentista que yera en metá d'a galería.
A fegura capecera d'o movimiento estió [[Henri Matisse]]. Belaltros artistas consideratos '''fauvistas''' -anque ta muitos no significó que qualquecosa temporal- estioron [[André Derain]], [[Albert Marquet]], [[Maurice de Vlaminck]], [[Georges Rouault]], [[Raoul Dufy]], [[Georges Braque]] y [[Kees van Dongen]].
En o '''fauvismo''' se perciben bellas [[influencia artistica|influencia]]s, como a d'os neoimpresionistas u a d'os postimpresionistas [[Cézanne]], [[Gauguin]] y [[Van Gogh]]. O estilo, de vez, influyó considerablement en muitos d'os movimientos posteriors d'o expresionismo europeu.
