Villar d'el Salz (Comunidat de Teruel)

Este articlo tracta sobre Villar d'el Salz, actualment lo vico de Las Granjas de Cella, pa veyer lo lugar de la comarca de lo Xiloca homonino vaiga a l'articlo Villar d'el Salz.

Villar d'el Salz (actualment en castellán Las Granjas), ye un vico de Cella situau en lo norte de lo suyo termin municipal en la marguin ezquierda de la Cequia de la Grancha, chusto a cantos de lo termin de Santa Olalia.

Toponimia

La primera posible mención ye en lo Muqtabis V de Ibn Hayyan, en un texto que fa referencia a una expedición militar andaluza contra Zaragoza en l'anyo 935 y on se diz que acamporon en Saliz, amán de la fortaleza de Sahla (Cella).

En los textos meyevals figura en latín como Vilar de Salice, Vilar de Salz y variants. En Aragón los toponimos Salz tamién son asociatos a muitas antigas pertenencias de la Orden de Cistels. Manimenos lo Villar ha estato de la branca cisterciense de Poblet representata por lo Monesterio de Piedra, y no de la branca de Rueda que ye con la que se relacionan estos toponimos (lo Monesterio de Rueda tamién se dició Monesterio del Salz porque lo primer puesto d'Aragón on s'establioron yera Salz de Galligo).

Actualment en la part norte de lo termin de Cella mos trobamos unas quantas partidas que fan referencia a este vico: Las Granjas, La Granja, Granjilla, que continan en lo sud de lo termin de Santa Olalia con Campo de la Granja. Entre los dos termins bi ha un barranco dito Barranco del Campo de la Granja.

Historia

En l'anyo 1195 fue donau por Alifonso II d'Aragón a los monches de lo Monesterio de Piedra.

Dono insuper predicto monasterio vilare de Salice cum medietate totius hereditatum sive alodii que est inter castrum sancte Eulalie et predicto vilare de Salice, et sit [..... ..... ..... .....] de Salice, quod afrontat ex una parte versus illam cequiam maiorem que discurrit inter vilarium Cremat et vilar de Salice

En 1210 bi ha un texto on se fa referencia a que Villar del Salz yera de los monches cistercienses de lo Monesterio de Piedra:

grangias illas vestras scilicet Perils et vilar de Saltse, que sunt in termino de Turol

En 1217 bi'n ha atro:

Quia cum locus ipse de Petra in quo eiusdem abbatis monasterium est fundatum, et grangia que dicitur Vilar de Salz, necnon et triginta kafizcia salis in salinis de Monterd a recolende memorie regibus Aragone eidem monasterio