Abrir menú principal
Xiringa con cullestro d'o segundo día, en comparanza con una leit materna de formula.

O cullestro[1][2][3][4] u culliestro[5][6] (d'o latín <colostrum[7][8]) ye la primer leit que tienen as mullers y as fembras d'os mamiferos quan son amanadas a parir u plegan de parir. O cullestro comienza a fer-se uns días enantes d'o naiximiento, remata bells días dimpuesas, y tiene una proporción especial d'inmunoglobulinas solubles y celulas d'o sistema inmunitario que sirven pa dar-le a lo chovenón recién-naixiu a suya primer dosi d'inmunidat adquiesta.

O cullestro tiene una caracteristica color amarillisca que produce una cantidat superior a la normal d'albumina y carotens. Tamién ye riquismo en sals minerals y proteínas, pero os nivels de graixa y lactosa son inferiors a os d'a leit posterior.[9]

A función importantisma d'o cullestro ye guaranciar a supervivencia d'a cría en os primers días dimpués de naixida, pus l'organismo naixe sin inmunidat adquiesta, y os mecanismos d'a inmunidat innata estarían de tot insuficients pa concarar-se y superar una eventual infección en ixos días. O cullestro treslada una batería d'elementos d'a respuesta inmune adquiesta por a mai en a suya vida a la cría, pa achudar-le dica que ella se'n pueda fer os suyos propios.

Contenius

Funcions d'o cullestroEditar

Celulas en o cullestroEditar

Antimás d'inmunoglobulinas solubles, como a IgA, y atras proteínas, como a lactoferrina y lactotransferrina, o cullestro contiene celulas móbils d'o sistema inmunitario, os leucocitos, en gran numero. En mamiferos como a vaca s'ha determinau que o numero d'ixas celulas puede estar superior a 1.000.000 cel/ml de cullestro.[10]

A proporción de leucocitos en o cullestro de vaca s'ha determinau en 23% de leucocitos, 38% de neutrofilos y 40% de macrofagos.[10]

Atras caracteristicasEditar

O cullestro ye una secrección escasa pero a-saber-lo densa, y o paso ta la leit materna de días posteriors ye progresivo.[11] De cullestro, se'n produce en un volumen d'entre 2 y 20 mililitros por cada tetada, con una cantidat no superior a 100 ml en as primeras 24 horas, mientres que d'a leit que viene dimpués tiende a producir-se-ne entre 500 y 700 ml por cada día[11] en a resta d'a lactancia.

S'ha sinyalau que o creiximiento d'a secrección ye relacionau con a maduración d'a función renal d'o crío, que no estaría capable de procesar volumens grans de liquido en as primeras horas.[11] Asinas, a transición de cullestro enta leit se fa progresivament y de forma achustada con a capacidat medradera d'os rinyons de procesar o volumen de liquido d'inchesta.

A lactoferrina y a inmunoglobulina A no desapareixen d'a leit materna en toda la lactancia.[11] O que pasa ye que deixan d'estar en una proporción altisma en o cullestro pa pasar a diluir-se más en o volumen d'a leit madura posterior.

Entre o quatreno y o quinceno día de lactancia (en H. sapiens) o cullestro se diluye y as glandulas mamarias producen o que se diz leit de transición.[11] Si l'alumbramiento se produce quan a mai encara ye dando teta a un ninón anterior, se pasa igualment por una fase de cullestro pa o crío segundo.[11]

ReferenciasEditar

  1. (es) CORONAS CABRERO, Mariano, Vocabulario aragonés de Labuerda-A Buerda (Sobrarbe); Xordica Editorial. Zaragoza, 2007. ISBN 978-84-96457-23-2
  2. (es) ARNAL PURROY, Mª Luisa, Diccionario del habla de la Baja Ribagorza Occidental -Huesca-; Gara d'Edizions. Zaragoza, 2003. ISBN 84-8094-052-2
  3. (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0
  4. (es) GIl, Antón Chusé, Léxico aragonés de Sos del Rey Católico; Crica d'Edizions. Zaragoza, 1999. ISBN 84-930635-0-9
  5. (es) TOMÁS ARIAS, Chabier, El aragonés del Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
  6. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007. ISBN 978-84-8094-058-0
  7. (es) Voz calostro en o DRAE; consultada l'11 de marzo de 2019.
  8. (es) MOTT, Brian L.. Diccionario etimológico chistabino-castellano castellano-chistabino. Institución «Fernando el Católico». Zaragoza, 2000. ISBN 84-7820-553-5
  9. 9,0 9,1 9,2 9,3 (es) Composición y propiedades de la leche materna, curso impartiu en a Unizar en 2003. Consultada l'11 de marzo de 2019.
  10. 10,0 10,1 (es) Nota acerca de terneros - Leucocitos en el calostro; consultada l'11 de marzo de 2019.
  11. 11,0 11,1 11,2 11,3 11,4 11,5 (es) La Leche Humana. Composición, beneficios y comparación con la leche de vaca; consultau l'11 de marzo de 2019.

Se veiga tamiénEditar

Vinclos externosEditar