Conchuncions concesivas en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Las conchuncions concesivas en aragonés se fan servir en la subordinación pa introducir unas proposicions que s'oposan a l'acción principal expresada en la oración principal. Estas proposicions indican una consecuencia inesperada u no deseyada, ye dicir, una complicación.

Maguer que / maguera que

En aragonés medieval una de las conchuncions concesivas de mayor emplego yera maguer que u maguera que, derivada d'un helenismo en latín. L'adchectivo griego macarios ("afortunau") se feba servir en vocativo (macarie) pa felicitacions con significau pareixiu a "parabiens", "n'hora buena", y evolucionó dimpués enta una intercheccions y conchuncions concesivas en latín vulgar y las luengas romances que en salioron.

Tot omne & toda muller si quier sean infançones o si quier no maguer que ayan fillos naturales pueden affillar a otros en lures bienes segun fuero.

Esta conchunción yera muito común en aragonés y castellano medievals, pero dende lo sieglo XV encomenzó a estar substuida por atras conchuncions concesivas como aunque.

Anque / onque

La conchunción anque puede ir seguida d'un verbo en modo subchuntivo si indica posibilidat (feito hipotetico u dubdoso) u en modo indicativo si indica un feito que no se puet cambiar (feito real). Si se describe una situación pasada u una ideya firme ye natural un verbo en indicativo.

La conchunción aunque ye documentada ya en lo Vidal Mayor y en lo Fuero de Navarra, pero ye dende lo sieglo XV que encomienza a suya expansión a costa d'atras conchuncions concesivas, documentando-se esta conchunción y no maguer que en l'aragonés terolano de lo sieglo XV:

jurando no pasaría, ahunque supiessen vender sus fijos

La forma anque ye la mes estendillada en aragonés y se documenta dende Ansó dica Ribagorza Baixa, podendo coexistir con las atras formas en bella zona, como en Bielsa:

• Anque vivís doscientos anyos no'l veyerí.
• Me'n he d'ir a ixe puesto encantau...anque'l camino seiga esbarizoso,... (aragonés meyo-ribagorzano de Campo).
• Anque estoi qu'ixe instrumento no vale gran cosa güena. (aragonés belsetán).
• Anque encá ye luego, cal dar güelta a'l ganau.

La forma onque se da en Bielsa y en Ribagorza Baixa. Tamién se documenta en Campo, pero con usos no concesivos.

• Onque se'n fue la luz nos podiemos apanyar con tiedas.
• Pos yo millor voi con burros onque despaciet, (aragonés baixorrigorzán de Graus).

Encara que

La forma enca(ra) que se documenta en Bielsa, Chistau y Ribagorza Meya, y ye común con lo catalán y l'occitán, presentando un claro equivalent en lo francés encore que.

• No podrían fer-lo encara que queresen (aragonés chistabín).
• Me'n he d'ir a ixe puesto encantau...encara que perda uesos y carne (aragonés meyo-ribagorzano de Campo).
• No le'n diré encá que tiengo buenas ganas.

Mesmo si / mismo si

La conchunción mesmo si va seguida d'un verbo en infinitivo y equivale a la conchunción anque seguida d'un verbo en subchuntivo. Tiene lo suyo cognato en lo francés même si y se presenta en benasqués como mismo si:

Mismo s'i vas ara, ya no l'i trobarás.

A pesar de que

La locución conchuntiva a pesar de que se fa servir con feitos reals y equivale a los emplegos de anque con indicativo.

A pesar de que l'han empuxau, no s'ha cayiu.

A tamás que / por muito que

La locución conchuntiva a tamás que indica que un impedimento no evita una acción. Ye propia de l'aragonés occidental, en aragonés oriental se puede recurrir a por mas que / per mes que, por muito que / per molto que, y mesmo a anque/encara que.

• A tamás de lo que digas lo feré.
• A tamás que me lo digas no lo entiendo.
• Per mes que se i fague no'n ha de salre.
• Per molto que pllougue no serà prou.

Empero

En aragonés medieval teneba uso como conchuncion concesiva empero:

Empero el prometimiento simplament fue feyto de acorrer segunt que dito es porque fue muyt mala la jura.

Ya sía que

La locución conchuntiva ya sía que se troba a sobén en aragonés medieval:

Ya sia que en algunos lugares se ponga arbitro por juge delegado nose troba en ningun lugar que juge se ponga por arbitro.

Bibliografía

• (es) Javier Terrado Pablo: La lengua de Teruel a fines de la Edat Media. Instituto de Estudios Turolenses, 1991.
• (es) Chabier Tomás Arias: El aragonés del Biello Sobrarbe. Instituto de Estudios Altoaragoneses, 1999. ISBN 84-8127-095-4.
• (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN978-84-8094-061-0
• (es) Francho Nagore: Gramática de la Lengua Aragonesa. Zaragoza. Mira Editores. 1989.
• (es) Rafael Lapesa: Historia de la lengua española. Editorial Gredos, 2001.
• (es) Próspero de Bofarull y Mascaró, Manuel de Bofarull y de Sartorio, Francisco de Asís de Bofarull y Sans: Colección de documentos inéditos del Archivo General de la Corona de Aragón, Volumen 38. Editor: J.E. Montfort, 1870.