Basketbol

O basketbol^[1] u básket^[1] (de l'anglés basketball)^[1] ye un esporte de pilota que se chuga con as mans entre dos equipos composaus por cinco chugadors, que miran de meter-ie una pilota adintro d'a canasta esfendita por l'equipo contrario, con l'obchectivo de conseguir mas puntos que l'adversario, tot respectando as reglas d'o chuego. O suyo inventor estió James Naismith, profesor d'educación fisica d'a YMCA Training School (huei Sprinfild Colleg) de Sprinfield, en aviento de 1891.^[2]

Iste esporte y as suyas competicions son reguladas a livel internacional por a Federación Internacional de Basketbol (FIBA) establida en 1932 y que tien a suya seu en Chenova, Italia. Tien cinco confederacions: Europa, America, Asia, Africa y Oceania. En Europa ye a lo cudiau d'a Confederación Europea de Basketbol (FIBA Europa), en Espanya a Federación Espanyola de Basketbol (FEB) y en Aragón a Federación Aragonesa de Basketbol (FAB).

O basketbol tamién ye practicau por personas disminuidas fisicament y psiquica con reglas especificas ta éls; ta as primeras bi ha competicions en cadieras de ruedas, y o chuego y os campionatos son regulaus por a Federación Internacional de Basketbol en Cadiera de Ruedas (IWBF d'as suyas siglas en anglés).

Historia

Cal decir que bels historiadors atribuyen a os mayas la invención d'o basketbol,^[3] que chugaban un esporte ritual pareixiu dito tlachtli.

Pero o chuego moderno tenió o suyo orichen en os Estaus Unius en l'anyo 1891, inventau por James Naismith,^[2] que yera profesor d'educación fisica d'a YMCA Training School (huei Sprinfild Colleg) situata en Springfield (Massachusetts) y a qui s'encargó que inventase un esporte que se chugase a cubierto por que os hibiernos d'ixa parti d'o país yeran muit fríos y no se podeba fer garra actividat fisica en l'exterior. Mientres o sieglo XX o basketbol se fació popular, primerament con en plegar militars americanos mientres a Primera Guerra Mundial que popularizoron iste esporte en Europa y dimpués por a creyación d'a Federación Internacional de Basketbol en l'anyo 1932,^[4] y la suya inclusión en o programa d'os Chuegos Olimpicos como esporte olimpico dende los Chuegos Olimpicos de 1936 celebraus en Berlín,^[5] terminoron de fer-lo popular por tot o mundo.

O basketbol en Aragón

Pareixe que en zaguerias d'os anyos 1920 ya bi heba actividat basketbolistica en Zaragoza y concretament en o CN Helios pero no ye gaire claro. Una vegada rematada la guerra civil, en os anyos 1940 bi ha constancia de bels equipos como La Salle, Helios, Iberia y o Cerbuna en Zaragoza y d'a UD Huesca en Huesca.^[6]

En a temporada 1958-59 partecipa lo primer equipo aragonés en a Liga Espanyola de Basketbol, o CD Iberia de Zaragoza y en a temporada siguient també puyaría de categoría la sección de basketbol d'o CN Helios que chugó nomás que una temporada renunciando y a suya plaza fue ocupada por a sección de basketbol d'o Real Zaragoza.

Equipos de basketbol importants en Aragón

Partiu d'o Basket Zaragoza 2002 en o pabillón Prencipe Felipe.

Categoría principal: Equipos de basketbol d'Aragón.

Marco d'o chuego

Pista de basketbol.

Obchectivo d'o chuego: L'obchectivo d'o chuego ye de ficar una pilota en una cesta posada a una altura determinada seguntes unas reglas y limitacions estableixitas.
Pista de chuego: A pista a on se chuga ye un rectanglo de 12-15 metros d'amplaria y de 22-28 de largaria dividiu en dos metaz iguals. En o centro d'a linia bi ha un cerclo de 3,6 metros de diametro. Por dencima d'as linias de fundo a una altaria de 3,05 m y a una profundidat de 1,20 m se troban situatas as cestas. Paralela y a 5,80 m d'a linia de fondo bi ha a linia de tiros libres. Bi ha una atra linia semicircular conoixida como linia de 3 puntos que dista 6,75 m d'a canasta.
Durada: Un partiu seguntes as reglas d'Europa, y as d'a FIBA, ye dividiu en cuatre partis de 10 minutos cadaguna dende la categoría cadete. Un partiu tien una durada total de 40 minutos de tiempo real sin contar os tiempos muertos, cuan a pilota sale fuera y atras interrupcions. En categorías de edaz inferiors a durada ye proporcional a la edat d'os chugadors. En as ligas americanas ye de cuatre cuartos de 12 minutos a l'NBA y de dos partis de 20 minutos en a NCAA.
Equipos:
- Chugadors: En a pista de chuegos nomás poden chugar que 5 chugadors por equipo, y ye a cantidat minima ta prencipiar un partiu.
- Suplents: Puet haber-ie dica 7 chugadors suplents con opción ta chugar registraus.
- Entrenadors: A sobén bi ha dos entrenadors por equipo, un de principal y un atro ta funcions secundarias. En as millors ligas puet haber-ie mes, especializaus en aspectos d'os chuegos (esfensa, ataque, tacticas entre d'atras).
Arbitros: En a mayor parti d'os partius dos arbitros son os encargaus de dirichir o partiu, pero en as ligas mes importants bi ha tres. En categorias inferiors a sobén nomás bi ha que un solo arbitro.
Mesa d'anotadors: A mesa d'anotadors y as personas que la componen son a lo cudiau de controlar todas as incidencias d'o partiu, puntuación, tiempos muertos, tiempo de chuego y faltas personals entre d'atras, y fa l'acta d'o partiu.

Principals reglas de chuego

Infraccions

Pasos: Ye una infracción que ye relacionada con o bote d'a pilota y l'abance de la persona que la porta. Dimpués de botar a pilota y agafar-la no se pueden dar mas de dos pasos sin soltar-la bien ta pasar-la o tirar a canasta. Tamién puet fer-se ista infracción dan un paso antis de botar a pilota.
Doples: Ista infracción es fa cuan un chugador bota la pilota con as dos mans, si bota agafa la pilota y la torna a botar sin que garra persona la toque antis y cuan un chugador salta con a pilota agafada y torna a o suelo sin pasar, tirar u soltar a pilota.
Campo atrás: L'equipo que ataca una vegata trescruza la linia d'o meyo campo con a pilota no puet tornar a pilota a suyo campo.
Faltas:
- Falta personal: cuan un chugador contacta con cualsiquier parti d'o suyo cuerpo con un adversario y li causa una desventacha u ye beneficiau. Ista acción puet estar feita en ataque u en esfensa y estará penalizada con una falta personal y a pilota ta l'atro equipo, cuan un chugador plega en cinco faltas será eliminau y no chugará mas en o partiu, en a NBA 6 faltas.
- Falta antiesportiva:
- Falta tecnica: Ye una infracción que penaliza lo comportamiento indebiu d'un chugador, entrenador u tecnico en un partiu de basketbol. L'equipo contrario podrá fer un tiro libre y continar con a posesión d'a pilota dimpués chugando-la dende la linia de banda u de fondo.
- Falta descalificant: Ye una infracción considerada grieu feita por cualsiquier miembro de l'equipo (chugadors, tecnicos y asistents), por cualsiquier acción considerada antiesportiva grieu (barallar-se, insultar, etc.), tamién ye considerada una falta descalificant l'acumulación de dos faltas tecnicas. Ye penalizada con a descalificación d'o responsable de l'acto y l'equipo contrario tirará un u dos tiros libres, dimpués chugará la pilota dende la linia de banda u de fundo.
Piez: Un chugador no puet tocar a pilota con os piez aconsiguindo una ventacha, ista acción estará penalizada con a posesión de pilota ta l'equipo contrario.
Zona: Un chugador no puet estar mas de tres segundos en ista zona cuan o suyo equipo chuga en ataque. L'equipo sera penalizau con a perda d'a posesión d'a pilota.

Competicions de basketbol

Categoría principal: Competicions de basketbol.

Campionatos de seleccións

As competicións de seleccións mas importants son o Campionato d'o Mundo de Basketbol, organizau por a Federación Internacional de Basketbol (FIBA d'as suyas siglas en anglés) cada cuatro anyadas y os Chuegos Olimpicos celebraus tamién cada cuatro anyos. Tamién bi ha competicions continentals como l'EuroBasket en Europa, o Campionato FIBA d'as Americas en America, l'Afrobasquet en Africa, o Campionato FIBA Oceanía‎ en Oceanía y o Campionato FIBA Asia en Asia.

Campionatos de clubs

A NBA (En anglés: National Basketball Association) ye una liga profesional de basketbol d'os Estaus Unius y, seguntes bel especialista, a millor liga d'o mundo.
L'ACB, ye a primera división d'a liga de basketbol profesional d'Espanya.
Hellenic Basketball.

Vinclos externos

Referencias

↑ ^1,0 ^1,1 ^1,2 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
↑ ^2,0 ^2,1 (en) Newly found documents shed light on basketball's birth.
↑ Historia del baloncesto
↑ (en) FIBA History.
↑ (en) Olympic medal winners
↑ (es) Cien años de baloncesto.

Datos: Q5372
Multimedia: Basketball / Q5372

[DORTO-1] 1,0 ^1,1 ^1,2 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.

[sports.espn.go.com-2] 2,0 ^2,1 (en) Newly found documents shed light on basketball's birth.

[3] Historia del baloncesto

[4] (en) FIBA History.

[5] (en) Olympic medal winners

[6] (es) Cien años de baloncesto.

[1]

[2]

[3]

[4]

[5]

[6]