Solanum melongena

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Solanum melongena
Mata d'alberchenas.
Denominacions populars
Alberchenera, mata de l'alberchena, mata d'alberchenas
Estau de conservación
Seguro (IUCN)
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Solanales
Familia:	Solanaceae
Subfamilia:	Solanoideae
Tribu:	Solanae
Chenero:	Solanum
Especie:	S. melongena
Descripción
Solanum melongena L., 1753

L'alberchenera (cientificament Solanum melongena (L., 1753)) ye una planta herbacia anyal en a familia d'as solanacias, cautivada amplament por o suyo fruito comestible; l'alberchena.

Descripción

L'alberchenera ye una planta de port herbacio, de gran mida (bels eixemplars arriban a creixer dica 80–90 cm d'alto), que pueder fer-se semi-enfiladera si se a guida u se a enreliga contra forquetas, arribando só que en ixas condicions dica lonchituz maximas d'arredol de 2 metros.

O tallo ye vuedo por adintro, semi-segmentau, y gosa meter-se tierco u semi-lignificau cuan madura. Se troba cubierto d'una pilosidat pubescent aspra a o tacto, pero en bels casos es pelos pueden estar tan duros que arriban a punchar. Tiene fuellas ovaladas u lobuladas, grans (10–30 cm de lonchitut por 5–10 cm d'amplo), con firme peciolo que as subchecta, alternas, contra o tallo.

As flors naixen en una inflorescencia umbeliforme, atrofiada, en a cual no i gosa estar funcional sique una flor (as menos vegadas, dos, que nunca maduran), por a cual cosa gosa pareixer que no sia si que una flor individual convencional. A flor ye actinomorfa, con una corola d'entre 25 y 50 mm de diametro que ye blanca, rosa u morada. Os estambres son amariellos, muit visibles. I ha flors hermafroditas y belatras que no son si que masculinas. En as flors hermafroditas (as solas que en tienen), l'ovario ye infero con o estigma estrellau.

O suyo fruito, l'alberchena, ye una baya carnosa d'entre 50 y 300 mm de largo, de forma oval, ovoide, elipsoide u piriforme, de cuticula brillant de regular negra u morada, muit escura, anque muitas variedaz presentan variacions en a color final de l'alberchena madura: en i hai blancas, amariellas, verdes, royas u dica claras con piquetas escuras.

Orichens

L'alberchena ye una hortalicia nativa d'o subcontinent indio. Conoixida dende l'Antiguedat por as civilizacions d'Asia, se'n teneba cultivars propios en territorios d'os actuals India, Pakistán y China. Os indicios mas antigos sobre a suya domesticación a situan fa bels 4.000 anyos^[1].

Bels autors europeus a describen en as suyas cronicas encara en l'Antiguedat, como Plinio lo Viello, pus seguntes diz yera un producto de comercio exotico que trayeban os merchants persas dica la cuenca mediterrania.^[1] Manimenos, a introducción d'o suyo cautivo en Europa fue tardana, en a Edat Meya,^[1] consecuencia de a expansión arabe d'os sieglos VII y VIII, qui a trayón t'a Peninsula Iberica.^[1] Asinas, ye una d'as pocas solanacias cautivadas que no gosó estar traita d'America, a diferencia de parients suyas como o tomate, a trunfa u o pimiento.

Cautivo

A mata de l'alberchena ye una planta muit sensible y especialment intolerant a o frido, razons por as cuals se fa dificil de criar en arias de montanya y rechions interiors. En Espanya, os polos de producción se centran en rechions de clima calido y litorals, especialment en os hibernaders d'o Sud y o Sudeste, d'influencia mediterrania y condicions muit controladas. En l'Alto Aragón o suyo cautivo ye testimonial, en hortals particulars, y nunca difuera d'un numer reduciu de matas. Tradicionalment, l'alberchena i ha teniu siempre fama d'estar un planta muit fina, que se moriba con facilidat, y con muit pocos exitos de cullita.

Nomás vive bien con temperaturas superiors a 15 °C, con muerte de teixius por debaixo d'os 10 °C, y con una temperatura optima ta'l creiximiento de 20-25 °C. Por contra, ye muit resistent a la calor, y gosa suportar sin guaire dificultat temperaturas diurnas persistents de mas de 40-45 °C.

Ye un cautivo de regano convencional, que no amenista mas augua que cualsiquier atra hortalicia u fruita domestica d'as cuals se'n pueda trobar en o huerto. Os problemas de mantenimiento solen venir, cuasi siempre, por as baixadas de temperatura y por o requerimiento de sol directo que tiene, que fa que si se guarda contra l'aire (practica habitual con atras plantas «fredolicas» como as pimenteras u as tomateras) p. ex. metendo-le una buxada alto, mingüe a-escape por a manca de luz.