Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un pueyo testigo u pueyo testimonio ye un pueyo u un mont, dependendo d'a escala, que destaca muito en un terreno on representa os zaguers restos d'una formación cheolochica que ha desapareixiu por un proceso prolongau d'erosión. Indican l'antiga extensión de plataformas estructurals u cuestas.[1]

Pueyos testigo en as Bardenas Reyals.
Esquema sobre a relación entre os pueyos testigo y las cuestas, texto en francés.
Zaguera expresión d'un pueyo testigo en as Bardenas Reyals antes de desapareixer por erosión d'o livel sedimentario resistent d'o cabalto.

En a depresión d'Ebro y atras cuencas sedimentarias d'edat terciaria d'a Peninsula Iberica bi ha uns pueyos testimonio caracteristicos ditos muelas, con un tramo d'estratos horizontals y resistents de calsinera, piedra d'arena u almendrón en o suyo cabalto visibles como cinglos. Manimenos bels autors consideran pueyo testimonio no a las muelas en cheneral sino a muelas chicotas u restos d'ellas y con forma conica a on encara s'observa una minima presencia d'os estratos duros en lo suyo cabalto,[1] como o Piagordo d'Andorra. Atro eixemplo de pueyo testimonio ye o Pueyo de Belchit, con un livel resistent de calsineras miocenas y a on se troba a ermita de Nuestra Sinyora d'el Pueyo.[2] En Villanueva de la Uerba bi ha un pueyo testigo dito Cabezo de Sant Pavlo.[3] En a Meseta Castellana os pueyos testimonio reciben a sobén a denominación d'alcores[4], arabismo que no ye desconoixiu de tot en Aragón, visible en a microtoponima de Tramacastiel y que talment aduye a interpretar o macrotoponimo "Alcorisa".

Cuan un pueyo testigo pierde tramo duro d'estratos que proteche os materials tovos se tornan en un antepueyo[1], que puet prener forma de teta, como se vei en Las Tetas de Robres[5] u en toponimos con a radiz "mambla" (parola que deriva d'o latín MAMULA). Una vegada que s'ha formau un antepueyo a erosión irá desfendo-lo con relativa rapideza a escala de tiempo cheolochico y se convertirá en una simpla loma u un simple puyalón en meyo d'una plana.

Veyer tamién editar

Referencias editar

  1. 1,0 1,1 1,2 (es) Francisco Pellicer Corellano, Maria Teresa Echeverría Arnedo Formas de relieve del centro de la depresión del Ebro pp63. Institución Fernando el Católico, 1989.
  2. (es) Miguel Arenillas Parra et al. La presa de Almonacid de la Cuba. Del mundo romano a la ilustración en la cuenca del río Aguasvivas. Gobierno de Aragón, 1996 p 73
  3. (es) Eduardo Viñuales Cobos: Red natural de Aragón. nº 25, Campo de Cariñena Prames, 2009.
  4. (es) Bermudo Meléndez, Jose María Fuster Geología Editorial Paraninfo, 1978. p 134
  5. (es) Fernando Biarge Piedra de Arena. El paisaje monegrino. Ediciones del Mallo 2004.