Huertalo (Samianigo)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

No entivocar-se con Huertolo, en o municipio d'a Canal de Berdún.

Huertalo (en castellano Huértalo) yera un lugar medieval situau en l'actual municipio de Samianigo.

Huertalo
Despoblau medieval d'Aragón
Entidat  • País  • Provincia  • Comarca  • Municipio	Despoblau medieval  Aragón  Uesca Alto Galligo Samianigo
Partiu chudicial	Chaca
Población  • Total	0 hab.
Altaria  • Meyana	830 m.
Parroquial  • Diocesi  • Arcipestrau	Chaca Samianigo
Coordenadas	42°23’13’’N 0°23’56’’U
Huertalo Huertalo en Aragón

Se troba en a Vallibasa, baixo a sierra de Sant Pero y amán de Samianigo Baixo.

Toponimia

Iste toponimo deriva d'o latín HORTU 'huerto' y sufixo diminutivo atono -alu.

Historia

Bi ha cuantos documentos d'o Cartulario d'o monesterio de Fanlo que charran sobre iste lugar. O primero (doc. 32), con calendata de 1055, recenta o intercambio entre Ximeno Garcés y donya Lopa d'una vinya en Huertalo por cinco fincas en Sardás.

Arredol de 1075 Ximeno Inyigones de Huertalo torna un mallolo (vinya recient plantada) a o monesterio de Sant Chenaro (doc. 65). A l'anyo siguient, en 1076, Lope Garcés de Huertalo fa de testigo en a entrega d'as posesions que teneba donya Oria en Oto y Saruisé a o debantdito monesterio.

En 1191, Sancho de Huertalo y os suyos fillos conceden a os monesterios de Mont Aragón y Fanlo cuantas heredatz (doc. 133). O zaguer documento d'o Cartulario (doc. 158), de l'anyo 1230, sinyala a Martín de Huertalo y a la suya muller, Clavigera, como beneficiarios d'un palacio y bellas tierras cedidas por Fernando, rector de Mont Aragón, en o mesmo lugar.

Ignacio de Asso fa mención d'iste lugar con o nombre de Huertolillo situando-lo "amán d'o Puent de Samianigo".

Leyendas

Una vegada más, como en atros muitos lugars de l'Alto Aragón se conserva o mito d'as güelas. Aquí as dos mullers fuoron acullidas por os habitants de Samianigo Alto y Samianigo Baixo, por o que se diz que as casas d'os dos lugars tienen campos en a val de Basa y que o mont ye comunal y compartiu por os dos.

En atras versions d'a historia se diz que en cuentas d'un lugar bi'n heba dos, la un dito Billar y l'atra Malaz y que as viellas pervivients veniban cadaguna d'un lugar. Ista versión talment tien sentiu, ya que d'antis más a zona yera conoixida por os habitants de Samianigo como "o Billar".