Balay

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Balay
Datos chenerals
Eslogan	Por un mundo mas cómodo
Establimiento	1947
Localización	Zaragoza, Aragón
Enfiladors	{{{enfiladors}}}
Industria	Electrodomesticos
Productos	Electrodomesticos
Beneficios	{{{reuto}}}
Emplegatos	{{{emplegaus}}}
Pachina web
Pachina web	www.balay.es/
Twitter	{{{twitter}}}
Facebook	{{{facebook}}}

Balay ye una interpresa aragonesa d'electrodomesticos establita en Zaragoza en 1947. Fue mercata por a multinacional alemana BSH en zaguerías d'a decada de 1980, y tanto as antigas fabricas como a marca Balay perteneixen actualment a BSH Electrodomésticos España.

Historia

Fabrica de Balay en Zaragoza

A interpresa Balay fue establita en 1947 en Zaragoza por Esteban Bayona, José María Lairla (que chuntando as suyas inicials forman o nombre d'a marca) y Alfredo Sartopina. Esteban Bayona estió president d'a companyía dica 1970.

En primeras s'adedicaba a la fabricación de reactancias ta iluminación y transformadors ta radios. En 1951 a interpresa se transformó en sociedat anonima y prencipió a fabricar aparatos electricos. A partir de 1956 Balay prencipia a fabricar electrodomesticos convirtiendo-se con o paso d'os anyos en un d'os prencipals fabricants nacionals y en una d'as marcas mas conoixitas d'Espanya. Balay prencipió fabricando cocinas y lavaderas de turbina. En 1966 prencipió a fabricar lavaderas automaticas y a partir de 1970 lavadors, estando una interpresa pionera en a fabricación d'istos dos productos en Espanya. Balay s'ha destacato historicament por mirar de desembolicar siempre tecnolochía propia.

A fabrica de Montanyana

Balay ha estato siempre ligata a la ciudat de Zaragoza, as sus fábricas se troban en o entorno rural d'a capital aragonesa. En 1968 s'inauguró a suya planta de Montanyana y en 1977 a fabrica d'a Cartuixa.

En primerías d'a decada de 1980 Balay yera una d'as interpresas líder d'o sector en Espanya y teneba mas de 2000 treballadors. Manimenos dende bels poquez anyos antis teneba una grieu crisi, que estió común a cuasi tot o sector espanyol de fabricants d'electrodomesticos de linia blanca; debito a la saturación d'o mercato nacional y a fin d'o proteccionismo. O sector veyió en Espanya, entre 1980 y 1987 una reducción d'o empleo dreito que cheneraba en cuasi un 50%.

Balay dentró en perdidas en 1979 y un anyo dimpués fació una primera regulación d'empleo que afectó a una important parti d'a plantilla.

En 1980 dentró a fer parti d'o plan de reconversión industrial d'o sector. As administracions publicas inchectoron una important cantidat de diners ta reflotar a interpresa y se realizó un important reachuste laboral. Dimpués d'a formación de cuantos holdings con atras interpresas d'o sector, en zaguerías Balay s'unió con un grupo d'interpresas navarras (antigo Grupo Orbaiceta) ta formar o Grupo Safel-Balay.

En 1989 se produció a reprivatización d'o Grupo Safel-Balay. O gubierno optó por vender o grupo a la multinacional BSH debant de l'atro candidato, a francesa Thomson SA. BSH mercó o 50,3% de Balay-Safel. Asinas naixió BSH Electrodomésticos España. En 1998 Balay quedaría de tot integrata en a estructura de BSH en mercar ista o 100% d'o capital.

Adintro de BSH Electrodomésticos España as plantas de Montanyana y A Cartuixa ganoron prou importancia. Montanyana puet considerar-se o centro d'operacions d'a companyía en Espanya y estió a seu social d'a interpresa, dica que ista se tresladó enta a localidat navarra de Uhart por motivos fiscals.

Balay hue

BSH conservó Balay como marca rechional d'a companyía orientata a os mercatos espanyol y portugués. Asinas hue en día se continan comercializando en a Peninsula Iberica tot tipo d'electrodomesticos baixo ista marca, estando fabricatos beluns en as antigas factorías de Balay y a mayoría en atras plantas d'o Grupo BSH.

Balay como marca encara tieno una alta cuota de mercato espanyol, alto u baixo un 10% y competindo con Fagor como primera marca d'o sector d'electrodomesticos d'Espanya. BSH también conservó a marca Lynx, que yera a segunda marca de Balay, y contina comercializando electrodomesticos d'ista marca en o mercato espanyol. As oficinas comercials de Balay se troban en Montanyana (Zaragoza).

Vinclos externos

• (es) Electrodomesticos Balay
• (es) BSH Electrodomesticos Espanya S.A.
• (es) Lynx