Azerins

(Reendrezau dende Azerís)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Azerins
Azərbaycanlılar, Azərbaycan türkləri
آذربایجانی ها ، ترک های آذربایجانی
Mesachas azerinas
Población total
35 millons-45 millons
Rechions con comunidaz importants
Azerbaichán 8.172.800[1]
Irán 23.500.000 [2]
Turquía 800.000
Rusia 622.000
Cheorchia 284.761
Alemanya 120 000 - 140 000
Ucraína 45.200
Países Baixos 17.000
Estaus Unius 400.000
Canadá 275 000[3]
Austria 1.000
Estonia 880
Australia 290
Dinamarca 116
Aragón 12[4]
atras rechions 30.000
Idiomas
Azerín
Relichión
Principalment chiismo; minorías de sunnismo, cristianismo, bahaísmo, y zoroastrismo
Pueblos relacionaus
Pueblos turquicos, caucasicos y iranios
Mapa

Mapa d'ubicación d'os azerins

Os azerins[5] u azerbaichanos[5] habitan en a republica d'Azerbaichán, y en o norte d'Irán (Azerbaichán Iraní), habendo-ie minorías azerins en l'antiga provincia iraní de Corastén, en as ciudatz de Teherán, y Qom y en o sud de Daguestán, en l'este de Cheorchia y en Armenia. Parlan una luenga turquica d'a branca oguz y son musulmans chiitas en a suya mayoría con minorías sunnitas d'a escuela xafí en o norte.

A traza de vida tradicional ye l'agricultura, cría de vacumen, artesanía y comercio. Bi ha cautivos de regano de cotón. Tamién bi ha ganadería transhumant con migración estacional dende as planas ta os monts. Os zaguers pastors purament nomadas estioron os airum, padar y shahseven y se sedentarizoron en o primer cuarto d'o sieglo XX.

Etnonimo editar

L'etnonimo moderno d'"azerbaichanos" se refiere a los turcos d'a República d'Azerbaichán y en ocasions de l'Azerbaichán iraní. Por a suya parti, l'etnonimo "azerins" se refiere a os miembros d'a etnia, sigan u no residents en ixa rechión; en efecto, parti d'a población de luenga azerina vive en el este de Turquía, en parti de Cheorchia, Armenia y a Republica de Daguestán (Rusia), asinas como en bellas zonas d'Irán difuera de l'Azerbaichán, tals como as provincias d'Ardabil, Qazvín y Zanyán.

Luenga editar

A luenga azerina s'escribe tradicionalment con alfabeto arabico, que encara fan servir en l'Azerbaichán iraní. Dende 1929 as autoridaz sovieticas cambeoron l'alfabeto arabico por l'alfabeto latino, pero lo cambeoron por l'alfabeto cirilico en 1939. Actualment bi ha una tendencia que aboga por tornar a l'alfabeto latino.

Historia editar

A etnochenesi d'os azerins ye principalment en a fusión d'os pueblos turquicos d'a branca oguz con os indichenas de luenga iranica principalment en o sieglo XI. Manimenos o proceso de turquización d'Azerbaichán s'aceleró muito en o contexto d'as guerras entre os otomans contra os safavidas que fació que muitos turquicos nomadas de l'este d'Anatolia fuyesen ta Persia y s'establisen a man d'a Mar Caspia convertindo-se os turquicos en mayoritarios debant de poblacions iranicas como os talixes y tatz u d'atros orichen como os udis u os armenios.

O Imperio Ruso conquirió a parte norte d'Azerbaichán a Persia, feito que se consumó en 1828. O gubierno ruso favoreixió a plegada d'armenios dende Persia y l'Imperio Otomán pa asegurar a suya posición a lo sud d'o Caucas. Os azerins encomenzoron a estar minoritarios en bella comarca y ciudat debant d'os armenios recient plegaus. Cualques azerins se facioron panturquistas y colabororon en a segunda fase d'o chenocidio armenio pero con menor importancia porque teneban menos medios y porque a posición de l'Armenia Oriental yera mes solida que la de l'Armenia Occidental en poder turco. En ixe contexto os azerins facioron una gran mortalera d'armenios en a ciudat de Xuxi, que pasó a estar una ciudat de población azerina predominant de tot. En 1918 l'Azerbaichán ruso proclamó a suya independencia, pero en 1920 fue conquiesto por l'exercito royo y encomenzó a suya sovietización convertindo-se en a Republica Socialista Sovietica d'Azerbaichán, dende a on l'exercito royo conquirió y esclafó l'Armenia independient d'entreguerras. Stalin adchudicó a rechión etnicament armenia de l'Alto Karabakh u Nagorno Karabakh a Azerbaichán, y dica se pensó adhibir tota l'Armenia sovietica en l'Azerbaichán sovietico.

En a Segunda Guerra Mundial os aliaus invadioron Irán pa evitar que s'aliniase con l'eixe, y l'exercito royo ocupó l'Azerbaichán iraní promovendo un movimiento autonomista. Dimpués d'a retirada en 1945 se creyó una autonomía que no duró que una anyada.

En a segunda metat d'o sieglo XX se formó una clase intelectual azerina con educación rusa u europea pero d'inspiración nacionalista. As siet decadas de dominio sovietico creyoron un profundo cambio social en Azerbaichán, con nuevas ciudaz, nuevas industrias, nuevas institucions. En 1988 encomenzó o conflicto entre armenios y azerins por a cuestión de l'Alto Karabakh. As mesmas autoridaz d'a Republica Socialista Sovietica d'Azerbaichán demandoron a los azerins de matar armenios, se facioron pogroms en tot o territorio. En consecuencia a población azerina d'Armenia fue perseguida por os nacionalistas armenios incontrolaus que tamién facioron mortaleras pero de muita menor mida. L'exercito sovietico intervinió cuan encomenzo a haber-ie amenazas xenofobas contra a población rusa d'Azerbaichán. A población armenia d'Azerbaichán emigró ta Armenia y atros países y se concentró en l'Alto Karabakh y 200.000 azerins d'Armenia fuyoron ta Azerbaichán.

En 1992 Azerbaichán se separó d'a comunidat d'Estaus independients (CEI). O conflicto contra os armenios continó, Azerbaichán continó con a campanya de deportacions y mortaleras d'armenios en as zonas cerca d'Armenia a lo norte de l'Alto Karabakh, que no controlaba de tot. A la fin, a población armenia de l'Alto Karabakh prenió o poder d'a suya rechión, forachitoron a las poblacions azerins, y amés ocuporon una zona de seguridat fuera de l'Alto Karabakh fendo un corredor con Armenia, ocupando dica 10 % d'o territorio d'Azerbaichán. Dimpués d'o conflicto d'Artsakh 2020 os azerins forachitaus podioron tornar a los territorios que conquirioron u recuperoron y quedoron vuidos d'armenios, como la ciudat de Xuxi.

Bibliografía editar

Referencias editar