Acer monspessulanum

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Acer monspessulanum
Acer monspessulanum
Estau de conservación
Seguro (IUCN)
Clasificación cientifica
Dominio:	Eukaryota
Reino:	Plantae
División:	Magnoliophyta
Clase:	Magnoliopsida
Orden:	Sapindales
Familia:	Aceraceae
Chenero:	Acer
Descripción
Acer monspessulanum Linnaeus,
Distribución cheografica
Distribución de Acer monspessulanum.

Acer monspessulanum (L.) ye una especie d'acirón que se troba en climas mediterranios, dende lo Prepireneu dica lo norte d'Africa, abitando en as rechions mes secas que no altras especies d'o chenero Acer, y per ixo ye la especie d'acirón que mes abunda en a tierra baixa d'Aragón y las sierras meridionals, estando la mes sobentera en os Monegros y Chabalambre.

Ye un arbolet de mida chiqueta, que no gosa pasar t'alto d'os 10 u 15 metros. A tronco suyo ye griso fusco, de crosta tierca en os arbolez mes chóvens, pero tanuda en os viellos. As fuellas las tiene mes chicas (3–6 cm) que no en as altras especies d'Acer, con tres lobulos que tienen as laderas arronchadetas. Son mas coriacias (duras) que no en a resta d'especies d'acirons, y se palpan como porosas.

A especie ye gosato tener diferents nombres cientificos que le i han meso diferents autors en os años: Acer commutatum y Acer loscosii, que se pueden considerar sinonimos pero que a sobén amaneixen en a bibliografía. En aragonés, encara que no se sole fer garra distinción d'entre las diferents especies d'acirons, decindo-ne acirón u escarroner como en a resta d'especies d'o chenero, se ye puesto documentar a variant local «acirón royo» ta destinguir-la d'as familiars.

Acerals d' Acer monspessulanum

Acer monspessulanum per un regular se presenta como un arbolet y ye una especie mes xerofila que resiste millor a sequera y os extremos termicos que Acer granatense. Ye mes tipico d'o nord-este que d'o sudeste d'a Peninsula Iberica. Forma selvetas en Chabalambre y sectors de Gúdar a on que no bi ha A. granatense, y en enclaus intermeyos como lo barranco del hocino, siempre d'entre os 1000 y 1450 m. No gosa ser present chunto con A. granatense en Teruel y només se'n troba chuntos en os arredols d'o cuello a on naixen o barranco de las Torres y l'arroyo de la Pasqueta, (termins de Nogueruelas y Linars de Mora). En Sestrica el trobamos en chunto con fraixins d'una selva de ribera sobre substrato silicio.

Por un regular A. monspessulanum se troba en os dominios d'a carrasca u/y la sabina, y a vegatas con Pin royo (en o barranco del Val de La Puebla de Valverde, en Chabalambre, a on que bi ha un aceral muit bien conservato). Un altro aceral d'intrés tamién ye en La Puebla de Valverde, ye lo un d'o barranco de La Cederilla (toponimo prou explicativo), a on l'aceral ye conservato de tot en o suyo barranco segundario. En o Mas del Manzano y Mas del Peral de La Puebla de Valverde en a part alta d'o Barranco de la Vallomba, aciron grans. En la Puebla de Valverde bi ha un altro aceral de consideración, o d'o barranco del Focino en chunto con un caixicar a on que bi ha a sola cita de Sorbus torminalis d'o sudeste d'a provincia de Teruel.

O matical (sotobosque) que acompanya a A. monspessulanum ye composato per Juniperus communis, Juniperus phoenicea, Juniperus sabina, Lonicera xylosteum u rosacias como Crataegus monogyna, Prunus spinosa, Prunus mahaleb, Rosa sp., Amellanchier ovalis, Cornus sanguinea, ecetra...

Cuan se degrada l'aceral y i amaneixen orlas arbustivas se fan os allacars de Genista scorpius y Genista hispanica, y si se contina degradando se i fa un matical baixo de plantas labiatas con Satureja montana, Lavandula latifolia, Thymus vulgaris (tremonciello), ecetra...

D'entre as herbacias mes representativas i trobamos Saponaria ocymoides, Stachys heraclea, Primula veris, Geum sylvaticum, ecetra. Ye común o lastonar de Brachypodium phoenicoides en as zonas secas y Brachypodium sylvaticum en os paraches frescos, asinas como Briza media y Dactylis glomerata. Entre as orquidias podemos trobar Ophrys sphegodes, Ophrys lutea, Orchis purpurea, Cephalantera rubra, Cephalantera damasonium, Epipactis parvifolia, Epipactis microphyla, Epipactis helleborine, Listera ovata, ecetra...

Galería d'imachens

• 
  Tronco.
• 
  Fuella.
• 
• 
• 

Vinclos externos

• Wikispecies tiene un articlo sobre Acer monspessulanum.
• Se veigan as imáchens de Commons sobre Acer monspessulanum.